ភ្នំពេញ៖ ប្រទេសកម្ពុជា និងប្រទេសក្រូអាស៊ី នឹងពង្រីកកិច្ចសហប្រតិបត្តិការទ្វេភាគីបន្ថែមលើវិស័យជាសក្តានុពលសំខាន់ៗរួមមាន សេដ្ឋកិច្ច វិនិយោគ វប្បធម៌ និងទេសចរណ៍។ ការពង្រីកកិច្ចសហការនេះ នឹងធ្វើឡើងតាមរយៈការរៀបចំឱ្យមានកិច្ចពិគ្រោះយោបល់រវាងក្រសួងការបរទេសរបស់កម្ពុជា និងក្រសួងការបរទេសរបស់ក្រូអាស៊ី នាចុងឆ្នាំ២០២៤នេះ។

ក្រៅពីការពង្រីកកិច្ចសហប្រតិបត្តិការទ្វេភាគី កិច្ចពិគ្រោះយោបល់រវាងក្រសួងការបរទេសរបស់ប្រទេសទាំងពីរ នឹងធ្វើឱ្យកម្ពុជា និងក្រូអាស៊ី រឹតបន្តឹងចំណងមិត្តភាពបន្ថែមទៀតផងដែរ។ គម្រោងរៀបចំកិច្ចពិគ្រោះយោបល់រវាងភាគីទាំងពីរ បានផ្តួចផ្តើម និងឯកភាពដោយឯកឧត្តម ឃួន ផុនរតនៈ រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ និងឯកឧត្តមបណ្ឌិត Ivan Velimir Starčevic ឯកអគ្គរដ្ឋទូតនៃសាធារណរដ្ឋក្រូអាស៊ីប្រចាំកម្ពុជា ដែលមាននិវេសនដ្ឋាននៅប្រទេសម៉ាឡេស៊ី កាលពីថ្ងៃទី២៦ ខែកក្កដា។

ការចុះផ្សាយរបស់ក្រសួងការបរទេស កាលពីថ្ងៃទី២៦ ខែកក្កដា ឆ្នាំ២០២៤ បញ្ជាក់ថា ឯកឧត្តម ឃួន ផុនរតនៈ និងឯកឧត្តមបណ្ឌិត Ivan Velimir Starčevic ក៏បានចែករំលែកទស្សនៈមួយចំនួនពាក់ព័ន្ធនឹងកិច្ចការតំបន់ និងអន្តរជាតិ ដែលជាក្តីបារម្ភរួមផងដែរ៕