ភ្នំពេញ៖ កម្ពុជា សម្រេចបានការនាំចេញអង្ករទៅកាន់ទីផ្សារអន្តរជាតិចំនួន ៥៧៥ ៥៦២ តោន ដែលគិតជាទឹកប្រាក់មានចំនួន ៤១៣,៩០ លានដុល្លារ ក្នុងរយៈពេល ១១ខែ ក្នុងឆ្នាំ២០២៤។ តាមរបាយការណ៍របស់សហព័ន្ធស្រូវអង្ករកម្ពុជា នាថ្ងៃទី១១ ខែធ្នូ ឆ្នាំ២០២៤ អង្ករចំនួន ៥៧៥ ៥៦២ តោននេះ បាននាំចេញទៅកាន់ ៦៧គោលដៅ តាមរយៈ ៥៥ក្រុមហ៊ុន។

គោលដៅចំនួន ៦៧ ដែលកម្ពុជានាំចេញនោះ មានដូចជា៖ ប្រទេសនៅក្នុងទ្វីបអឺរ៉ុបចំនួន២៦ នាំចេញបាន ២៨៣ ៩៨១តោន មានទឹកប្រាក់ ២០៧,៥៥លានដុល្លារ, ប្រទេសជាសមាជិកអាស៊ានមានចំនួន ៧ នាំចេញបាន ១១៣ ៧៩២ តោន មានទំហំទឹកប្រាក់ ៧៦,៣៤លានដុល្លារ, ទៅកាន់ប្រទេសចិន និងតំបន់រដ្ឋបាលស្វយ័ត មានចំនួន ១០៩ ៤៤៨តោន ទទួលបានទឹកប្រាក់ ៦៩,៩៧លានដុល្លារ និងទៅកាន់៣៧ ប្រទេសផ្សេងៗទៀតនៅអាហ្វ្រិក មជ្ឈឹមបូព៌ា មានចំនួន ៦៨ ៣៤១ តោន មានទឹកប្រាក់ ៦០,០៤លានដុល្លារ។

សហព័ន្ធស្រូវអង្ករកម្ពុជា បានបញ្ជាក់ថា ប្រភេទអង្ករដែលកម្ពុជានាំចេញ មានដូចជា៖ អង្ករក្រអូបគ្រប់ប្រភេទមាន ៧៤,៨៥%, អង្ករសគ្រាប់វែងមានចំនួន ២០,១០%, អង្ករចំហ៊ុយមាន ២,៩៥%, អង្ករសរីរាង្គមាន ១,៨១% និងអង្ករផ្សេងៗទៀតមានចំនួន ០,២៩%។ ជាមួយគ្នានេះ កម្ពុជា ក៏បាននាំចេញស្រូវទៅកាន់ប្រទេសជិតខាងចំនួន ៤ ៦៤២ ៥១១ តោន ដែលមានទឹកប្រាក់ ១ ៣៧៨,៧៣ លានដុល្លារ ដែលក្នុងនោះ ចំនួន ៨៨% បានឆ្លងកាត់ការស្នើសុំបញ្ជាក់ឯកសារនាំចេញពីអាជ្ញាធរមានសមត្ថកិច្ច៕