ភ្នំពេញ៖ សហភាពសហជីពការងារសន្តិភាព (P.L.U.C) សហព័ន្ធសហជីព និងសមាគមសេដ្ឋកិច្ចក្រៅប្រព័ន្ធ បានចេញញត្តិគាំទ្រយ៉ាងពេញទំហឹងចំពោះការមិនអនុញ្ញាតឱ្យចេញអាជ្ញាប័ណ្ណដល់រថយន្តតាក់ស៊ី អគ្គីសនីរបស់បរទេស និងប្រទេសជិតខាង ឱ្យចូលមកប្រកបអាជីវកម្មនៅប្រទេសកម្ពុជា។ នេះបើតាមការចុះផ្សាយរបស់សហភាពសហជីពការងារសន្តិភាព (P.L.U.C) កាលពីថ្ងៃទី១៦ ខែកក្កដា ឆ្នាំ២០២៤។

សហព័ន្ធសហជីព និងសមាគមសេដ្ឋកិច្ចក្រៅប្រព័ន្ធ បានបញ្ជាក់ថា ការចេញញត្តិគាំទ្រនេះ ធ្វើឡើងតាមរយៈប្រសាសន៍របស់សម្តេចធិបតី ហ៊ុន ម៉ាណែត ដែលបានលើកឡើងកាលពីថ្ងៃទី១៣ កក្កដា ថា រាជរដ្ឋាភិបាលកម្ពុជា មិនបានអនុញ្ញាតឱ្យចេញអាជ្ញាប័ណ្ណដល់រថយន្តតាក់ស៊ីអគ្គីសនីរបស់បរទេស និងប្រទេសជិតខាង ឱ្យចូលមកប្រកបអាជីវកម្មនៅក្នុងកម្ពុជាឡើយ។

សហព័ន្ធសហជីព និងសមាគមសេដ្ឋកិច្ចក្រៅប្រព័ន្ធ បានឱ្យដឹងថា ក្នុងនាមសហភាពសហជីពការងារសន្តិភាព(P.L.U.C) សមាជិក សមាជិកាទាំងអស់តាមបណ្តារាជធានីខេត្ត គឺប្រឆាំងដាច់ខាត និងថ្កោលទោសចំពោះក្រុមប្រឆាំងជ្រុលនិយមមួយចំនួនតូច ដែលមានចេតនាញុះញង់បង្កើតនូវព័ត៌មានមិនពិត ឱ្យប្រជាពលរដ្ឋយល់ច្រឡំ ដែលចោទប្រកាន់មកលើរាជរដ្ឋាភិបាល ថាបានអនុញ្ញាតឱ្យរថយន្តតាក់ស៊ីអគ្គីសនីបរទេសមកប្រកបអាជីវកម្មកម្ពុជា។

ជាមួយគ្នានេះ សហព័ន្ធសហជីព និងសមាគមសេដ្ឋកិច្ចក្រៅ បានគាំទ្រនៅសារសំឡេងរបស់សម្ដេចធិបតី ហ៊ុន ម៉ាណែត ដែលបានដាក់ចេញនូវគោលនយោបាយជាតិ យុទ្ធសាស្ត្របញ្ចកោណដំណាក់កាលទី១ ដែលគិតគូរដល់អាជីវករ អ្នករត់ម៉ូតូឌុប កង់បី និងរថយន្តតាក់ស៊ី សេដ្ឋកិច្ចក្រៅប្រព័ន្ធ នៅក្នុងប្រទេសកម្ពុជា៕