ភ្នំពេញ៖ ក្រុមហ៊ុន និងសហគ្រាសចិនមួយចំនួន បានចាប់អារម្មណ៍ចំពោះបរិយាកាសពាណិជ្ជកម្ម និងវិនិយោគរបស់កម្ពុជា ជាពិសេសច្បាប់វិនិយោគថ្មី ដែលផ្តល់ភាពអនុគ្រោះ។ ជាមួយគ្នានេះ លោក ឡៅ ងួន អេង អនុព័ន្ធពាណិជ្ជកម្មកម្ពុជាអមស្ថានអគ្គកុងស៊ុលកម្ពុជាប្រចាំទីក្រុងក្វាងចូវ ក៏បានលើកទឹកចិត្តឱ្យក្រុមហ៊ុនដែលមានបច្ចេកវិទ្យា និងនវានុវត្តន៍របស់ចិន ចុះពិនិត្យភាពជាក់ស្តែងនៅកម្ពុជានាពេលខាងមុខផងដែរ។

ក្នុងសន្និសីទ 2025 International Economic and Trade Cooperation Exchange Conference កាលពីថ្ងៃទី៨ ខែមករា ឆ្នាំ២០២៥ លោក ឡៅ ងួន អេង ក៏បានបង្ហាញពីវិស័យសក្តានុពលរបស់កម្ពុជាសម្រាប់ការធ្វើពាណិជ្ជកម្ម និងវិនិយោគ ជាមួយនឹងកំណើនសេដ្ឋកិច្ច ពាណិជ្ជកម្ម និងវិនិយោគពីបរទេស ពិសេសការធានាសុខសន្តិភាព និងស្ថេរភាពនយោបាយជាមួយនឹងភាពអនុគ្រោះខ្ពស់នៃច្បាប់វិនិយោគថ្មីរបស់កម្ពុជា។

គួរបញ្ជាក់ថា គោលបំណងសំខាន់នៃការរៀបចំសន្និសីទខាងលើ គឺដើម្បីផ្តល់ការផ្លាស់ប្តូរព័ត៌មានដែលពាក់ព័ន្ធនឹងពាណិជ្ជកម្ម និងវិនិយោគរបស់ប្រទេសដែលមានស្ថានអគ្គកុងស៊ុលប្រចាំនៅទីក្រុងក្វាងចូវ ជាមួយសហគ្រាស និងក្រុមហ៊ុននៅខេត្តក្វាងទុង ដើម្បីពិនិត្យលទ្ធភាពធ្វើពាណិជ្ជកម្ម និងវិនិយោគនៅបរទេស៕