ភ្នំពេញ៖ ឯកឧត្តម ហ្សាក់ បឺឡេ ឯកអគ្គរដ្ឋទូតបារាំងប្រចាំកម្ពុជា បានលើកឡើងថាស្ថានភាពវិនិយោគផ្ទាល់ពីបារាំងមកកម្ពុជាមានកម្រិតនៅឡើយ។ ដោយមើលឃើញដូចនេះ ឯកឧត្តម ហ្សាក់ បឺឡេ បានសន្យាក្នុងកម្មវិធីលៀងសាយភោជ កាលពីថ្ងៃទី៩ ខែកក្កដា ឆ្នាំ២០២៤ ថា នឹងព្យាយាមបន្ថែមទៀត ក្នុងការជំរុញពង្រីកការវិនិយោគ ដោយផ្ទាល់ពីបារាំងនៅកម្ពុជាឱ្យបានច្រើន។

ក្នុងកម្មវីធីលៀងសាយភោជ នៃវេទិកាធុរកិច្ចបារាំង-កម្ពុជា លើកទី២ ឆ្នាំ២០២៤ ដែលទទួលវិនិយោគិនប្រមាណ ២០០នាក់ នៅទីស្ដីការក្រុមប្រឹក្សាអភិវឌ្ឍន៍កម្ពុជា ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា រំពឹងថា កម្ពុជានឹងមានកំណើនវិនិយោគិនបារាំងកើនឡើងមួយកម្រិតទៀត បន្ទាប់ពីបញ្ចប់វេទិកាធុរកិច្ចនេះ។ ជាមួយគ្នានេះ ឯកឧត្តម ស៊ុន ចាន់ថុល មុនបំណាច់ឆ្នាំ២០២៤ ក៏គ្រោងធ្វើដំណើរទៅប្រទេសបារាំងដើម្បីគោះទ្វារទាក់ទាញវិនិយោគិនឱ្យមកវិនិយោគនៅកម្ពុជាបន្ថែម។

ការបន្តផ្ដល់ភាពរាក់ទាក់ជូនវិនិយោគិនបារាំង តាមរយៈពិធីលៀងសាយភោជនេះ ក៏មានការចូលរួមពី ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ, ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល, អ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា និងឯកឧត្តម លោកជំទាវ អ្នកឧកញ៉ា ឧកញ៉ា និងធុរជនកម្ពុជា-បារាំងជាច្រើននាក់៕