ភ្នំពេញ៖ និយ័តករមូលបត្រកម្ពុជា (ន.ម.ក.) នឹងរៀបចំវគ្គបណ្តុះបណ្តាលនិងការប្រឡង និងកម្មវិធីអប់រំវិជ្ជាជីវៈបន្ត ក្នុងវិស័យមូលបត្រ លើកទី២៩ ដល់ក្រុមហ៊ុនផ្តល់សេវាក្នុងវិស័យមូលបត្រ។ នេះបើតាមសេចក្តីជូនដំណឹង របស់ន.ម.ក. ដែលចុះផ្សាយនាថ្ងៃទី២៥ ខែកុម្ភៈ ឆ្នាំ២០២៥។

បុគ្គលផ្តល់សេវាក្នុងវិស័យមូលបត្រ ក្រុមហ៊ុនធ្វើអាជីវកម្មមូលបត្រ ក្រុមហ៊ុនធ្វើអាជីវកម្មគម្រោងវិនិយោគរួម ក្រុមហ៊ុនបោះផ្សាយ និងក្រុមហ៊ុនធ្វើអាជីវកម្មឧបករណ៍និស្សន្ទ ដែលមានបំណងចូលរួមក្នុងវគ្គបណ្តុះបណ្តាលខាងលើ អាចចុះឈ្មោះ និងបង់ថ្លៃតាមអនឡាញ តាមរយៈគេហទំព័រ https://training.serc.gov.kh/។ ចំពោះការចូលរួម ត្រូវបង់ថ្លៃចំនួន ១,២លានរៀល ក្នុងម្នាក់ និងករណីបុគ្គល ដែលចុះឈ្មោះក្រោយកាលបរិច្ឆេទដែលបានកំណត់ ត្រូវបង់ថ្លៃចំនួន ១,៥លានរៀល ជាកំហិត៕