ភ្នំពេញ៖ សមាជិកម្នាក់ៗក្នុងសហគមន៍កសិកម្មទំនើប«បន្លែផ្ទះសំណាញ់ត្រាំកក់» មានផ្ទះសំណាញ់ ២ខ្នង ទទួលបានប្រាក់ចំណេញក្នុងរង្វង់ ៧៥ម៉ឺនរៀល ខណៈពេលដែលកសិករនៅក្រៅសហគមន៍ភាគច្រើនកំពុងរងការខាតបង់ពីដំណាំបន្លែ។

ប្រាក់ចំណេញប្រមាណ ៧៥ម៉ឺនរៀលនេះ ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លើកឡើងថា មាន៧០% បានមកពីប្រាក់រង្វាន់លើការថែទាំបន្លែ និង៣០% ទៀតទទួលបានបន្ថែមពីសហគមន៍ក្រោយការទូទាត់ចំណាយប្រចាំខែរួចរាល់។

ឯកឧត្តម ឃឹម ហ្វីណង់ បន្តថា៖ «នេះជាប្រាក់ចំណេញភាគលាភប្រចាំខែដល់សមាជិក ជាលើកទី៤ ទោះបីជាប្រាក់ភាគលាភក្នុងខែនេះ ទាបជាងកាលពីខែមុនបន្តិច ដោយសារទទួលរងសម្ពាធពីការធ្លាក់ចុះនៃថ្លៃបន្លែលើទីផ្សារ តែសហគមន៍នៅតែបន្តធានាបាននូវប្រាក់ចំណេញសមរម្យជាប្រចាំ ដែលមានស្ថេរភាព»។ សហគមន៍កសិកម្មទំនើប «បន្លែផ្ទះសំណាញ់ត្រាំកក់» អាចលក់ចេញបន្លែក្នុងរង្វង់ ១៥០០រៀល ក្នុងគីឡូក្រាម ខណៈដែលកសិករនៅក្រៅសហគមន៍ភាគច្រើនកំពុងរងការខាតបង់ពីការទទួលបានថ្លៃ ត្រឹមតែ៥០០រៀល ក្នុងមួយគីឡូប៉ុណ្ណោះ៕