ភ្នំពេញ៖ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ជួបសំណេះសំណាលជាមួយក្រុមសិស្ស និងគ្រូបង្រៀន ដែលតំណាងកម្ពុជាក្នុងកម្មវិធីជំរុំសិស្សវិទ្យាសាស្ត្រ អាស៊ាន+៣ លើកទី១៥ និងសិក្ខាសាលាគ្រូបង្រៀនវិទ្យាសាស្ត្រ លើកទី១៧។ ឯកឧត្តម ហែម វណ្ណឌី បានបញ្ជាក់ពីការយកចិត្តទុកដាក់ និងកិច្ចខិតខំប្រឹងប្រែងរបស់រាជរដ្ឋាភិបាល ក្នុងការបណ្តុះទេពកោសល្យវ័យក្មេងផ្នែកវិទ្យាសាស្ត្រ។

សម្រាប់ឆ្នាំ២០២៦ កម្ពុជា បានបញ្ជូនតំណាងចូលរួមចំនួន៨ រូប ត្រូវបានជ្រើសរើសតាមរយៈការប្រកួតប្រជែងថ្នាក់ជាតិ សម្របសម្រួលដោយលេខាធិការដ្ឋាន ASEAN-COSTI នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ ក្នុងអំឡុងពេលនៃកម្មវិធីនេះ ក្រុមសិស្សកម្ពុជាដណ្តើមបានពានរង្វាន់ជាច្រើន រួមមានពានរង្វាន់ធំ (Grand Prize) ចំនួនពីរ ពានរង្វាន់ឧត្ដមភាព(Excellence Awards) ព្រមទាំងមេដាយប្រាក់ និងសំរិទ្ធ ដែលឆ្លុះបញ្ចាំងពីសមត្ថភាព ចំណេះដឹង និងការធ្វើការជាក្រុមលើគម្រោងវិទ្យាសាស្ត្រ។

កម្មវិធីប្រចាំឆ្នាំ ដែលរៀបចំឡើងដោយមជ្ឈមណ្ឌលអាស៊ាន+៣ សម្រាប់សិស្សវិទ្យាសាស្ត្រ (ACGS) នេះ បានប្រមូលផ្តុំអ្នកចូលរួមចំនួន១២៩នាក់ រួមមានសិស្ស ៩៦នាក់ មកពីបណ្តាប្រទេសសមាជិកអាស៊ាន ប្រទេសចិន សាធារណរដ្ឋកូរ៉េ និងស៊ុយអែត៕