ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានចុះអនុស្សរណៈនៃការយោគយល់គ្នា ( MOU) ជាមួយឯកឧត្តម គីស៊ីដា ហ្វូមីអូ នាយករដ្ឋមន្រ្តីជប៉ុន លើកិច្ចសហការសំខាន់ៗចំនួន៧។ ការចុះ MOU នេះ ធ្វើឡើងនៅទីក្រុងតូក្យូ ប្រទេសជប៉ុន នាថ្ងៃទី១៨ ធ្នូ ២០២៣ ក្នុងឱកាសនៃការចូលរួមកិច្ចប្រជុំកំពូលរម្លឹកខួបអនុស្សាវរីយ៍អាស៊ាន-ជប៉ុន លើកទី៥០ ចាប់ពីថ្ងៃទី១៥-១៩ ខែធ្នូ ឆ្នាំ២០២៣។

តាមការចុះផ្សាយរបស់សម្តេចធិបតី កិច្ចសហការទាំង៧ នេះ រួមមាន៖ ១. គម្រោងអភិវឌ្ឍន៍មជ្ឈមណ្ឌលផ្ទុកទិន្នន័យជាតិឆ្ពោះទៅរកការលើកកម្ពស់រដ្ឋាភិបាលអេឡិចត្រូនិក, ២. គម្រោងអភិវឌ្ឍន៍ប្រព័ន្ធគ្រប់គ្រងការផ្គត់ផ្គង់ទឹកស្អាតបែបឌីជីថលក្នុងតំបន់ទីប្រជុំជន និង ៣. គម្រោងស្នើសុំនាវាសម្រាប់វាស់ស្ទង់ជលធារសាស្ត្រ សម្រាប់ផលិតផែនទីនាវាចរណ៍អេឡិចត្រូនិក។

៤. កំណត់ហេតុរួមរវាងក្រសួងប្រៃសណីយ៍ និងទូរគមនាគមន៍ និងក្រសួងកិច្ចការផ្ទៃក្នុង និងគមនាគមន៍ជប៉ុន ស្ដីពី៖«កិច្ចសហប្រតិបត្តិការសម្រាប់ការអភិវឌ្ឍសេដ្ឋកិច្ច និងសង្គមឌីជីថលក្នុងប្រទេសកម្ពុជា», ៥. អនុស្សរណៈនៃកិច្ចសហប្រតិបត្តិការរវាងធនាគារជាតិកម្ពុជា និងក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន ស្តីពី៖កិច្ចសហប្រតិបត្តិការនៃការទូទាត់ឆ្លងដែនតាមរយៈ QR Code»។

ដោយឡែក ទី៦. អនុស្សរណៈនៃការយោគយល់គ្នារវាងក្រសួងរ៉ែ និងថាមពល ជាមួយក្រុមហ៊ុន Minebea Mitsumi និងក្រុមហ៊ុន SchneiTec ស្តីពី៖«កិច្ចសហប្រតិបត្តិការលើគម្រោងថាមពលព្រះអាទិត្យ (សូឡា)» និង៧. អនុស្សរណៈនៃការយោគយល់គ្នារវាងក្រសួងរ៉ែ និងថាមពល ជាមួយ ក្រុមហ៊ុន erex Co. Ltd និងក្រុមហ៊ុន SPHP (Cambodia) ស្ដីពី៖«កិច្ចសហប្រតិបត្តិការលើគម្រោងថាមពលជីវម៉ាស»។

ក្រៅពីការចុះអនុស្សរណៈនៃការយោគយល់គ្នាទាំង៧ខាងលើ សម្តេចធិបតីនាយករដ្ឋមន្ត្រីកម្ពុជា ក៏បានជួបពិភាក្សាការងារជាមួយនឹងវិស័យឯកជន និងបណ្តាវិនិយោគគិនជាច្រើនផងដែរ ដើម្បីជំរុញនិងលើកទឹកចិត្តដល់ពួកគេឱ្យមកបណ្តាក់ទុនវិនិយោគនៅកម្ពុជា៕