ភ្នំពេញ៖ កម្ពុជា និងអេមីរ៉ាតអារ៉ាប់ សម្រេចបានទំហំពាណិជ្ជកម្មប្រមាណ ៧៥លានដុល្លារ រយៈពេល ១០ខែ ឆ្នាំ២០២៤ កើនឡើង៧% បើធៀបនឹងរយៈពេលដូចគ្នា ឆ្នាំ២០២៣ ដែលក្នុងនោះកម្ពុជា នាំចេញប្រមាណ ៥៥លានដុល្លារ និងនាំចូលប្រមាណ ២០លានដុល្លារ។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី២០ ខែវិច្ឆិកា ឆ្នាំ២០២៤។

ចំពោះទំនិញសំខាន់ៗ ដែលកម្ពុជាបាននាំចេញទៅកាន់ទីផ្សារអេមីរ៉ាតអារ៉ាប់ មានដូចជាសម្លៀកបំពាក់ ស្បែកជើង កាបូប យានយន្តនិងគ្រឿងបង្គុំ និងផលិតផលកៅស៊ូ។ ចំណែកទំនិញសំខាន់ៗ ដែលនាំចូលពីអេមីរ៉ាតអារ៉ាប់មកកម្ពុជាវិញ រួមមាន៖ ប្រេងនិងកៅស៊ូប៊ីទីម ថ្នាំជក់ ផលិតផលប្លាស្ទិក ម៉ាស៊ីននិងឧបករណ៍អគ្គិសនី ចំណីកែច្នៃសម្រាប់សត្វ និងគ្រឿងសង្ហារឹមជាដើម។ ការសម្រេចបានកំណើនពាណិជ្ជកម្មនេះ គឺបានមកពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា និងអេមីរ៉ាតអារ៉ាប់រួម (Cambodia-UAE CEPA) ដែលភាគីទាំងពីរ ចូលជាធរមាន កាលពីថ្ងៃទី៣១ ខែមករា ឆ្នាំ២០២៤។

ក្នុងពិធីបើកសិក្ខាសាលាផ្សព្វផ្សាយអំពីអត្ថប្រយោជន៍នៃកិច្ចព្រមព្រៀង Cambodia-UAE CEPA លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម ក៏បានលើកឡើងថា អត្ថប្រយោជន៍នៃកិច្ចព្រមព្រៀងខាងលើ កម្ពុជាទទួលបាន ដូចជា៖ អាចនាំទំនិញទៅកាន់ទីផ្សារអេមីរ៉ាតអារ៉ាប់រួម ក្នុងអត្រាពន្ធសូន្យលើមុខទំនិញសំខាន់ៗ, ការពង្រឹង និងពង្រីកទំនាក់ទំនងទ្វេភាគី ជំរុញការធ្វើសមាហរណកម្មក្នុងសកម្មភាពពាណិជ្ជកម្មទំនិញ សេវាកម្ម ទាក់ទាញវិនិយោគ និងធ្វើពិពិធកម្មទីផ្សារនាំចេញទំនិញទៅកាន់ទីផ្សារអេមីរ៉ាតអារ៉ាប់រួម តំបន់អារ៉ាប់ និងតំបន់ក្បែរខាងផងដែរ៕