ភ្នំពេញ៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានបង្ហាញពីសក្តានុពលរបស់កម្ពុជា ជាពិសេសក្នុងវិស័យឧស្សាហកម្មកែច្នៃ ថាមពលបៃតង ហេដ្ឋារចនាសម្ព័ន្ធ និងការប្រើប្រាស់កម្ពុជា ជាច្រកតភ្ជាប់ទៅកាន់ទីផ្សារក្នុងតំបន់អាស៊ាន និងពិភពលោកដល់ឥស្សរជននយោបាយសំខាន់ៗតំណាងឱ្យទីក្រុងម៉ុងត្រេអាល់ ដែលជាមជ្ឈមណ្ឌលសេដ្ឋកិច្ចរបស់កាណាដា និងទាក់ទាញឱកាសវិនិយោគពីក្រុមហ៊ុនកាណាដា។

ក្នុងកម្មវិធីទទួលទានអាហារថ្ងៃត្រង់ធុរកិច្ច ដើម្បីបង្កើនបណ្តាញទំនាក់ទំនងរវាងសហគមន៍ធុរកិច្ចកម្ពុជា និងកាណាដា ឯកឧត្តម ស៊ុន ចាន់ថុល ក៏បានបញ្ជាក់ពីការប្តេជ្ញាចិត្តរបស់កម្ពុជាក្នុងការធានានូវសន្តិភាព ស្ថិរភាព និងកំណើនសេដ្ឋកិច្ច តាមរយៈការអនុវត្តកំណែទម្រង់រដ្ឋបាល សេវាសាធារណៈ និងការចាប់យកឌីជីថលូបនីយកម្មផងដែរ៕