ភ្នំពេញ៖ ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា កិច្ចប្រជុំកំពូលវាយនភណ្ឌសកលនៅកម្ពុជាប្រចាំឆ្នាំ២០២៥ នឹងធ្វើឱ្យប្រទេសកម្ពុជាក្លាយជាគោលដៅទាក់ទាញបន្ថែមទៀតទាំងអាជីវកម្ម និងវិនិយោគិន។ នេះបើតាមការចុះផ្សាយរបស់ក្រសួងការងារ កាលពីថ្ងៃទី៣១ ខែមីនា ឆ្នាំ២០២៥។

ក្នុងកិច្ចប្រជុំកំពូលវាយនភណ្ឌសកលនេះ ឯកឧត្តម ហេង សួរ បានបន្តថា កិច្ចប្រជុំកំពូលនេះ នឹងពិភាក្សាស្វែងរកផ្លូវកែលម្អស្តង់ដាការងារ ការគ្រប់គ្រងបរិស្ថាន ការអនុវត្តសេដ្ឋកិច្ចចក្រា និងការត្រៀមខ្លួន ដើម្បីឆ្លើយតបទៅនឹងការរំពឹងទុកជាសកលក្នុងការពង្រឹងសមត្ថភាពរបស់វិស័យវាយនភណ្ឌឱ្យមានភាពរីកចម្រើន។ ឯកឧត្តមរដ្ឋមន្ត្រីក្រសួងការងារ បានបញ្ជាក់ថា ជាច្រើនឆ្នាំមកនេះ កម្ពុជាគឺជាអ្នកផ្គត់ផ្គង់ផលិតផលវាយនភណ្ឌដ៏សំខាន់ ជាពិសេសទៅកាន់ទីផ្សារសហរដ្ឋអាម៉េរិក និងអឺរ៉ុប។

គួរជម្រាបថា កិច្ចប្រជុំកំពូលវាយនភណ្ឌសកលនៅកម្ពុជា (Cambodia Global Textile Summit 2025)នេះ ជាវេទិកាជួបជុំរវាងថ្នាក់ដឹកនាំនៃរាជរដ្ឋាភិបាល ម្ចាស់ម៉ាកអន្តរជាតិ អ្នកពាក់ព័ន្ធក្នុងឧស្សាហកម្ម តំណាងនិយោជក អង្គការតំណាងកម្មករនិយោជិត ដើម្បីស្វែងយល់ពីយុទ្ធសាស្ត្រ និងគោលនយោបាយ ធ្វើឱ្យកម្ពុជាក្លាយជាគោលដៅទាក់ទាញបន្ថែមទៀតសម្រាប់អាជីវកម្មដែលកំពុងស្វែងរកប្រភពទំនិញ សេវាកម្ម និងការផលិត៕