ភ្នំពេញ៖ អគ្គស្នងការដ្ឋាននគរបាលជាតិ បានបញ្ជាក់ថា Power Bank មិនអាចលួចទិន្នន័យពីទូរសព្ទអ្នកប្រើប្រាស់បានឡើយ។ ការបញ្ជាក់បែបនេះរបស់អគ្គស្នងការនគរបាលជាតិ ក្រោយមានសារសំឡេងមិនពិតរបស់ស្ត្រីម្នាក់ដែលអះអាងថា Power Bank អាចប្រើប្រាស់ដើម្បីលួចយកទិន្នន័យ ឬលួចលុយចេញពីគណនីទូរសព្ទ។

ពាក់ព័ន្ធនឹងករណីខាងលើនេះ អគ្គស្នងការដ្ឋាននគរបាលជាតិ បានអំពាវនាវដល់សាធារណជន ពិសេសអ្នកប្រើប្រាស់បណ្តាញសង្គមកុំបន្ដចែកចាយព័ត៌មានប្រឌិត តាមរយៈសារសំឡេងរបស់នារីដែលជាជនអនាមិកម្នាក់នោះ។ តាមការចុះផ្សាយរបស់អគ្គស្នងការដ្ឋាននគរបាលជាតិ នាថ្ងៃទី៨ ខែកក្កដា ឆ្នាំ២០២៤ បានឱ្យដឹងថា អគ្គស្នងការដ្ឋាននគរបាលជាតិ កំពុងបើកការស្រាវជ្រាវយ៉ាងយកចិត្តទុកដាក់ ដើម្បីចាត់វិធានការតាមផ្លូវច្បាប់ចំពោះជនអនាមិកដែលប្រឌិតព័ត៌មានបំពុល និងនាំឱ្យប៉ះពាល់ដល់សន្ដិសុខជាតិ៕