ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា កម្ពុជា មានមហិច្ឆតាចង់បាននូវការវិនិយោគ លើឧស្សាហកម្មដែលមានតម្លៃបន្ថែមដូចជាគ្រឿងយន្ត គ្រឿងម៉ាស៊ីន និងគ្រឿងបង្គុំជាដើម។ ក្នុងជំនួបជាមួយលោកស្រី Deborah FRANCE-MASSIN ប្រធានការិយាល័យសកម្មភាពនិយោជក នៃអង្គការអន្តរជាតិខាងការងារ(ILO) នៅទីក្រុងហ្សឺណែវ ប្រទេសស្វីស ឯកឧត្តម ហេង សួរ បានបន្តថា ក្នុងនោះកម្ពុជាបានដាក់ចេញនូវគោលនយោបាយនៃការបណ្តុះបណ្តាលជំនាញបច្ចេកទេស និងវិជ្ជាជីវៈផងដែរ។

ក្នុងជំនួបពិភាក្សាការងារនេះ ឯកឧត្តម ហេង សួរ បានបញ្ជាក់បន្ថែមថា ចំពោះតម្រូវការកំណើនសេដ្ឋកិច្ច និងការអភិវឌ្ឍ កម្ពុជាក៏បានកំពុងបង្កើតការងារសមរម្យសម្រាប់ប្រជាពលរដ្ឋផងដែរ នេះបញ្ជាក់អំពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការគោរពលក្ខខណ្ឌស្តង់ដារការងារតាមរយៈការទទួលស្គាល់នៃអនុសញ្ញារបស់អង្គការអន្តរជាតិខាងការងារជាដើម។

ឯកឧត្តមរដ្ឋមន្ត្រីក្រសួងការងារ ក៏បានរំលឹកពីការជួយបណ្តុះបណ្តាលនិងការពង្រឹងសមត្ថភាពដល់សហព័ន្ធនិយោជកកម្ពុជាកាលពីពេលកន្លងទៅ ដែលបានរួមចំណែកធ្វើឱ្យនិយោជកកម្ពុជាកាន់តែមានសមត្ថភាពខ្ពស់មួយកម្រិតបន្ថែមទៀត។ តាមការចុះផ្សាយរបស់ក្រសួងការងារ នាថ្ងៃទី១២ ខែមិថុនា ឆ្នាំ២០២៤ លោកស្រី Deborah FRANCE-MASSIN បានលើកឡើងថា ភាពចាំបាច់នៃគម្លាតរវាងកម្មករនិយោជិត និងនិយោជក ជាចំណុចសំខាន់ក្នុងការបង្កើតបរិយាកាសការងារឱ្យល្អប្រសើរ៕