ភ្នំពេញ៖ ត្រីបបែលយក្សទឹកសាប ទទួលបានវិញ្ញាបនបត្រកំណត់ត្រាពិភពលោកចំនួន២ រួមមាន ត្រីទឹកសាបធំបំផុត (ត្រីបបែលយក្សទម្ងន់៣០០គីឡូក្រាម ដែលអ្នកនេសាទចាប់បានដោយចៃដន្យ នៅភូមិកោះព្រះ ឃុំកោះព្រះ ស្រុកសៀមបូក ខេត្តស្ទឹងត្រែង) និងសំណាកត្រីបបែលយក្សដែលធំបំផុតពីស្ថាប័នកំណត់ត្រាពិភពលោក (Guinness World Records)។

រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ឯកឧត្តម ហាស់ សារ៉េត ចូលរួមទទួលវិញ្ញាបនបត្រកំណត់ត្រាពិភពលោកស្តីពី«ត្រីទឹកសាបធំបំផុត» របស់ Guinness World Records នាថ្ងៃទី១៤ ខែវិច្ឆិកា ឆ្នាំ២០២៣ នៅពិធីសិក្ខាសាលាថ្នាក់អន្តរជាតិស្តីពី«ស្ថានភាពត្រីបបែលយក្សទឹកសាបក្នុតំបន់ទន្លេមេគង្គ»។ ក្នុងពិធីនេះ ឯកឧត្តមមានប្រសាសន៍ថា ការចូលរួមថែរក្សា ការពារ និងអភិរក្សប្រភេទត្រីមេពូជនៅក្នុងទន្លេមេគង្គលើ គឺជាការរក្សាបាននូវប្រភពពូជត្រី សម្រាប់ចែកចាយទៅតំបន់បឹងទន្លេសាប ទន្លេមេគង្គក្រោម និងតំបន់លិចទឹកផ្សេងទៀត។

ជាមួយគ្នានេះ ឯកឧត្តមរដ្ឋលេខាធិការ ហាស់ សារ៉េត ក៏បានប្រគល់ប័ណ្ណសរសើរដល់អ្នកពាក់ព័ន្ធចំនួន២៦នាក់ ក្នុងការការពារ និងអភិរក្សធនធានជលផល ដែលកំពុងរងគ្រោះនេះ។ សមិទ្ធិផលដ៏គួរឲ្យកត់សម្គាល់នេះ បានមកពីកិច្ចខិតខំប្រឹងប្រែងរបស់ថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ដែលមានរដ្ឋបាលជលផលជាសេនាធិការ ស្ថាប័នពាក់ព័ន្ធ រដ្ឋបាលថ្នាក់ក្រោមជាតិ អង្គការដៃគូអភិវឌ្ឍន៍ជាតិ និងអន្តរជាតិ និងសហគមន៍នេសាទ ដែលបានចូលរួមថែរក្សា ការពារ និងអភិរក្សធនធានជលផល។

ពិធីទទួលវិញ្ញាបនបត្រកំណត់ត្រាពិភពលោកនេះ ក៏មានវត្តមានចូលរួមពីឯកឧត្តម W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅប្រទេសកម្ពុជា, តំណាងក្រសួងធនធានទឹក, ប្រធានរដ្ឋបាលជលផល, តំណាង USAID ប្រចាំប្រទេសកម្ពុជា, តំណាងស្ថាប័នកំណត់ត្រាពិភពលោក (Guinness World Records), ប្រធានគម្រោងអច្ឆរិយភាពនៃទន្លេមេគង្គ ជាដើម៕