ភ្នំពេញ៖ ថ្ងៃទី២៦ ខែតុលា ឆ្នាំ២០២៦ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សមាគមអ្នកផ្គត់ផ្គង់ទឹកស្អាតកម្ពុជា និងស្ថានទូតអូស្ត្រាលីប្រចាំកម្ពុជា បានសហការរៀបចំ “សន្និសីទ និងពិព័រណ៍ពាណិជ្ជកម្មទឹកស្អាតកម្ពុជា លើកទី៦” ដោយមានតំណាងស្ថាប័នរាជរដ្ឋាភិបាល វិស័យទឹកស្អាត ដៃគូអភិវឌ្ឍន៍ ស្ថាប័នហិរញ្ញវត្ថុ វិទ្យាស្ថានស្រាវជ្រាវ និងអ្នកផ្គត់ផ្គង់បច្ចេកវិទ្យា ប្រមាណ ៣៥០រូបចូលរួម។

កម្មវិធីរយៈពេលពីរថ្ងៃនេះ ត្រូវបានរៀបចំឡើងក្រោមប្រធានបទ “នវានុវត្តន៍ថ្ងៃនេះ ដំណោះស្រាយទឹកសម្រាប់ថ្ងៃស្អែក” ដើម្បីផ្តល់ជាវេទិកាសម្រាប់ចែករំលែកចំណេះដឹង តាំងបង្ហាញបច្ចេកវិទ្យានវានុវត្តន៍ក្នុងវិស័យទឹកស្អាត ពង្រឹងភាពជាដៃគូ និងស្វែករកដំណោះស្រាយជាក់ស្តែង ក្នុងការលើកកម្ពស់សន្តិសុខទឹក ពង្រីកលទ្ធភាពទទួលបានទឹកស្អាត និងពង្រីកការផ្តល់សេវាទឹកស្អាតដែលធន់នឹងអាកាសធាតុនៅទូទាំងប្រទេស។

សន្និសីទនេះប្រព្រឹត្តិទៅ ខណៈដែលកម្ពុជា និងពិភពលោកកំពុងប្រឈមនឹងសម្ពាធប្រភពទឹក។ ការប្រែប្រួលអាកាសធាតុកំពុងបង្កើនហានិភ័យ ដែលពាក់ព័ន្ធនឹងគ្រោះរាំងស្ងួត ទឹកជំនន់ និងការផ្លាស់ប្តូររបបទឹកភ្លៀង។ ហានិភ័យទាំងនេះកើនឡើង ស្របពេលនឹងកំណើនតម្រូវការសេវាទឹកស្អាត ដែលដាក់សម្ពាធបន្ថែមលើហេដ្ឋារចនាសម្ព័ន្ធ និងធនធានដែលមានស្រាប់។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា៖ “ខណៈដែលកម្ពុជាកំពុងប្រឈមនឹងសម្ពាធកាន់តែខ្លាំងពីការប្រែប្រួលអាកាសធាតុ ពិសេសគ្រោះរាំងស្ងួត និងទឹកជំនន់ ការប្រើប្រាស់បច្ចេកវិទ្យាទំនើប និងការគ្រប់គ្រងបែបនវានុវត្តន៍ មិនមែនជាជម្រើសទៀតទេ ប៉ុន្តែជាកាតព្វកិច្ចយុទ្ធសាស្ត្រ ដើម្បីបង្កើនប្រសិទ្ធភាពប្រតិបត្តិការ គ្រប់គ្រងហានិភ័យ និងធានាការផ្គត់ផ្គង់ទឹកស្អាតប្រកបដោយគុណភាព សុវត្ថិភាព និរន្តរភាព និងថ្លៃសមរម្យ។"

ឯកឧត្តម ដេរិក យីប ឯកអគ្គរដ្ឋទូតអូស្ត្រាលីប្រចាំព្រះរាជាណាចក្រកម្ពុជា បានលើកឡើងថា៖ “អូស្ត្រាលី បានដើរតួនាទីយ៉ាងសំខាន់ក្នុងការធ្វើការជាមួយប្រទេសកម្ពុជា លើវឌ្ឍនភាពដ៏គួរឱ្យកត់សម្គាល់ ក្នុងការពង្រីកលទ្ធភាពទទួលបានទឹកស្អាត។ តាមរយៈភាពជាដៃគូអស់រយៈពេលជាងមួយទសវត្សរ៍ក្នុងវិស័យទឹកស្អាត អូស្ត្រាលី បានជួយឱ្យប្រជាជនកម្ពុជា ចំនួន ១,៣លាននាក់ ទទួលបានទឹកស្អាតតាមបំពង់ប្រើប្រាស់។ ខណៈសម្ពាធពីការប្រែប្រួលអាកាសធាតុ និងតម្រូវការទឹកបន្តកើនឡើង អូស្ត្រាលីនឹងបន្តគាំទ្របច្ចេកវិទ្យានវានុវត្តន៍ និងយន្តការហិរញ្ញប្បទានប្រកបដោយនិរន្តរភាព ដែលអាចជួយប្រតិបត្តិករផ្គត់ផ្គង់សេវាទឹកស្អាតចាំបាច់ទៅប្រជាពលរដ្ឋនៅទូទាំងប្រទេស។ ”

ការគាំទ្ររបស់អូស្ត្រាលីបានជួយឱ្យប្រតិបត្តិករឯកជនពង្រីកវិសាលភាពផ្គត់ផ្គង់ទឹកស្អាតតាមបំពង់ ទៅតំបន់ជនបទ និងតំបន់ដាច់ស្រយាល ហើយកំពុងបន្តពង្រឹងសមត្ថភាពវិស័យ និងជំរុញការប្រើប្រាស់បច្ចេកវិទ្យាថ្មីៗ។

លោក ឡេង ខៀវ ប្រធានសមាគមអ្នកផ្គត់ផ្គង់ទឹកស្អាតកម្ពុជា បានលើកឡើងថា៖ “ប្រតិបត្តិករផ្គត់ផ្គង់ទឹកស្អាតឯកជនដើរតួនាទីយ៉ាងសំខាន់ក្នុងការផ្តល់សេវាទឹកស្អាតដល់សហគមន៍នៅទូទាំងប្រទេសកម្ពុជា។ ក្រៅពីការចែករំលែកបទពិសោធន៍ សន្និសីទនេះក៏ផ្តល់ជាឱកាសដ៏សំខាន់សម្រាប់ប្រតិបត្តិករឯកជន ក្នុងការតាំងបង្ហាញ សិក្សា និងចាប់យកបច្ចេកវិទ្យាថ្មីៗ ពង្រឹងភាពជាដៃគូ និងកំណត់ដំណោះស្រាយជាក់ស្តែង ដែលអាចជួយពង្រីកសេវាទឹកស្អាតប្រកបដោយភាពជឿទុកចិត្ត និងតម្លៃសមរម្យនៅទូទាំងប្រទេស។”

សន្និសីទរួមមានបទបង្ហាញបច្ចេកទេស និងកិច្ចពិភាក្សា ស្តីពីបច្ចេកវិទ្យាទឹកស្អាតឆ្លាតវៃ ថាមពលស្អាត និងសេវាផ្គត់ផ្គង់ទឹកស្អាតដែលមិនបំភាយឧស្ម័ន ភាពធន់នឹងអាកាសធាតុនិងសន្តិសុខទឹក ការគ្រប់គ្រងនិងហិរញ្ញប្បទានសេវាទឹកស្អាតប្រកបដោយនិរន្តរភាព ព្រមទាំងយុទ្ធសាស្ត្រអភិវឌ្ឍអ្នកដឹកនាំជំនាន់ក្រោយក្នុងវិស័យទឹកស្អាតរបស់កម្ពុជា។

នេះជាលើកដំបូង ដែលសន្និសីទរួមបញ្ចូលវេទិកាផ្គូផ្គងអាជីវកម្ម ដែលអនុញ្ញាតឱ្យប្រតិបត្តិករផ្គត់ផ្គង់ទឹកស្អាត អ្នកផ្គត់ផ្គង់បច្ចេកវិទ្យា ស្ថាប័នហិរញ្ញវត្ថុ អ្នកផ្តល់សេវាគាំទ្រនានា និងដៃគូអភិវឌ្ឍន៍ ស្វែងរកភាពជាដៃគូ ឱកាសវិនិយោគ និងដំណោះស្រាយអាជីវកម្ម ដើម្បីពង្រឹងវិស័យទឹកស្អាតបន្ថែមទៀត។

ពិព័រណ៍ទឹកស្អាតក៏បាននាំយកផលិតផល សេវាកម្ម និងបច្ចេកវិទ្យានវានុវត្តន៍ពីស្ថាប័នក្នុងស្រុក និងអន្តរជាតិ ដែលកំពុងធ្វើការលើការគ្រប់គ្រងទឹកស្អាត ប្រសិទ្ធភាពប្រតិបត្តិការ និងការផ្តល់សេវា។