ភ្នំពេញ៖ ក្រុមហ៊ុន Bábolna TETRA ដែលជាក្រុមហ៊ុនឈានមុខគេមួយក្នុងវិស័យកសិកម្មរបស់ហុងគ្រី បានបង្ហាញពីគោលបំណងក្នុងការស្វែងរកឱកាសវិនិយោគបន្ថែមនៅកម្ពុជា ដែលជាចំណុចយុទ្ធសាស្ត្រមួយក្នុងតំបន់អាស៊ាន។ នេះជាការបញ្ជាក់របស់លោក István Bakos ភារៈធារីនៃការិយាល័យតំណាងស្ថានទូតហុងគ្រីប្រចាំទីក្រុងភ្នំពេញ និងជាតំណាងក្រុមហ៊ុន Bábolna TETRA។

ក្នុងជំនួបនោះ ឯកឧត្តម អ៊ុំ កុសល អនុរដ្ឋលេខាធិការក្រសួងពាណិជ្ជកម្ម បានបញ្ជាក់នូវការរគាំទ្រ និងការត្រៀមខ្លួនររបស់ក្រសួងពាណិជ្ជកម្ម ក្នុងកិច្ចសម្រួលពាណិជ្ជកម្មជូនធុរជន និងវិនិយោគិនហុងគ្រី ដែលមានបំណងមកវិនិយោគនៅកម្ពុជា សំដៅប្រែក្លាយរាល់កាលានុវត្តភាពឱ្យទៅជាផលប្រយោជន៍សេដ្ឋកិច្ចសម្រាប់ប្រទេសទាំងពីរ។ 

ជាមួយគ្នានេះ ភាគីទាំងពីរ បានពិភាក្សាលើការជំរុញទំនាក់ទំនងសេដ្ឋកិច្ចឱ្យកាន់តែល្អប្រសើរ តាមរយៈការពិនិត្យលើវឌ្ឍនភាពនៃកិច្ចពិភាក្សា និងកិច្ចព្រមព្រៀងនានាដែលបានអនុវត្តនាពេលកន្លងមក ពិសេសដើម្បីពង្រឹងកិច្ចសហប្រតិបត្តិការពាណិជ្ជកម្ម និងវិនិយោគទ្វេភាគី៕