ភ្នំពេញ៖ ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម លើកទឹកចិត្តឱ្យក្រុមហ៊ុនថៃពង្រីកអាជីវកម្មបន្ថែមនៅកម្ពុជា ដើម្បីទាញយកអត្ថប្រយោជន៍ពីបរិយាកាសវិនិយោគនៅកម្ពុជា និងជំរុញនាំចេញផលិតផលកម្ពុជា ទៅកាន់ប្រទេសថៃឱ្យបានកាន់តែច្រើន។ នេះបើតាមការចុះផ្សាយរបស់ក្រសួងពាណិជ្ជកម្ម នៅថ្ងៃទី១៦ ខែសីហា ឆ្នាំ២០២៤។

ក្នុងពិធីបើកសម្ពោធពិព័រណ៍អន្តរជាតិ «BCG THAI FESTIVE FAIR 2024» ដែលមានក្រុមហ៊ុនប្រទេសថៃ និងកម្ពុជាជាង ២០០ក្រុមហ៊ុន ដោយមានស្តង់សរុបចំនួន ២៥០ស្តង់ បានដាក់បង្ហាញផលិតផលម៉ាកល្បីៗរបស់ថៃ ឯកឧត្តម សំហេង បូរ៉ា បានអរគុណស្ថានទូតថៃប្រចាំកម្ពុជា ដែលបានរៀបចំពិព័រណ៍នេះឡើង និងទាក់ទាញក្រុមហ៊ុនធំៗថៃឱ្យចូលរួមផងដែរ។ ក្រុមហ៊ុនធំៗរបស់ថៃ ដែលចូលរួមពិព័រណ៍អន្តរជាតិ នៅមជ្ឈមណ្ឌលសន្និបាតនិងពិព័រណ៍កោះពេជ្រនោះ មានដូចជា៖ ផ្សាទំនើប Makro, 7-Eleven, Big C, PTT, SCG, CP Cambodia, Betagro Global House និង TOA ជាដើម។

គួរបញ្ជាក់ថា ពិព័រណ៍ «BCG THAI FESTIVE FAIR 2024» បានរៀបចំឡើងចាប់ពីថ្ងៃទី១៥-១៨ ខែសីហា ឆ្នាំ២០២៤ ដែលមានក្រុមហ៊ុនថៃ និងកម្ពុជាសរុបជាង ២០០ក្រុមហ៊ុន បានដាក់តាំងបង្ហាញផលិតផលម៉ាកល្បីៗរបស់ថៃជាច្រើន។ ផលិតផលម៉ាកល្បីៗ រួមមាន៖ ផលិតផល OTOP គ្រឿងសម្អាង និងផលិតផលសុខភាព គ្រឿងប្រើប្រាស់ក្នុងផ្ទះនិងផ្ទះបាយ វត្ថុអនុស្សាវរីយ៍ និងការតុបតែងគេហដ្ឋាន ពិសេសផលិតផល និងបច្ចេកវិទ្យាដែលមិនប៉ះពាល់បរិស្ថានពីប្រទេសថៃ (Bio-Circular Green Economy: BCG)៕