ភ្នំពេញ៖ កម្មវិធីស្បៀងអាហារពិភពលោក នៃអង្គការសហប្រជាជាតិ (UNDP) នឹងពិនិត្យលទ្ធភាពទិញកសិផលពី «សហគមន៍កសិកម្មទំនើប» ដើម្បីផ្តល់អាហារូបត្ថម្ភដែលមានសុវត្ថិភាពដល់កុមារតូចៗ នៅសាលារៀនគោលដៅជាង១០០០ ទូទាំងប្រទេសកម្ពុជា តាមរយៈ«កម្មវិធីផ្ដល់អាហារតាមសាលារៀន»។ នេះបើតាមការចុះផ្សាយរបស់ ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២៤ ខែកក្កដា ឆ្នាំ២០២៤។

ក្នុងជំនួបពិភាក្សាជាមួយកម្មវិធីស្បៀងអាហារពិភពលោកនៃអង្គការសហប្រជាជាតិ ឯកឧត្តម ឃឹម ហ្វីណង់ បានឱ្យដឹងថា សហគមន៍កសិកម្មទំនើប នឹងអាចចូលរួមចំណែកផ្គត់ផ្គង់សាលារៀនតាម «កម្មវិធីផ្ដល់អាហារតាមសាលារៀន» ក្នុងតម្លៃប្រកួតប្រជែង ជាមួយនឹងបរិមាណផ្គត់ផ្គង់ ដែលមានស្ថេរភាពផងដែរ។ ឯកឧត្តម ឃឹម ហ្វីណង់ បន្តថា សហគមន៍កសិកម្មទំនើប នឹងផ្តល់ជាប្រភពផ្គត់ផ្គង់ច្បាស់លាស់ ពិសេសធានាបាននូវគុណភាព និងសុវត្ថិភាព១០០% ដល់សិស្សានុសិស្ស។

កិច្ចសហការផ្ដល់អាហារតាមសាលារៀននេះ នឹងផ្តល់ឱ្យភាគីពាក់ព័ន្ធទទួលបានអត្ថប្រយោជន៍រួមមាន៖ កសិករទទួលបានផលចំណេញ, សិស្សានុសិស្សនឹងទទួលបានអាហារមានគុណភាពខ្ពស់ និងកម្មវិធីផ្ដល់អាហារតាមសាលារៀនផ្ទាល់ ក៏អាចសន្សំសំចៃថវិកាដើម្បីយកទៅពង្រីកវិសាលភាពផងដែរ។ កម្មវិធីផ្ដល់អាហារតាមសាលារៀន គឺជាកម្មវិធីមួយដែលចំណាយថវិកាប្រមាណ ១០លានដុល្លារក្នុងមួយឆ្នាំ ក្នុងការទិញកសិផល ដើម្បីទ្រទ្រង់ជាអាហារូបត្ថម្ភដល់កុមារតូចៗនៅសាលារៀនគោលដៅនៅកម្ពុជា៕