ភ្នំពេញ៖ សម្តេចតេជោ ហ៊ុន សែន អំពាវនាវឱ្យពលរដ្ឋខ្មែរ ដែលធ្វើការនៅប្រទេសថៃ ត្រឡប់មកមាតុភូមិវិញ មុនពេលអាជ្ញាធរថៃបណ្តេញចេញ និងប្រមាថ ព្រោះសម្តេច ព្យាករថា ជម្លោះព្រំដែនកម្ពុជា និងថៃនឹងអូសបន្លាយពេលយូរ ពិសេសនៅពេលកម្ពុជា ដាក់ពាក្យប្តឹងទៅកាន់តុលាការយុត្តិធម៌អន្តរជាតិ (ICJ)។

សម្តេចតេជោ ហ៊ុន សែន បន្តដូច្នេះថា៖ «ជារឿងពិត ដែលបាននិងកំពុងកើតឡើង និងត្រូវតែកើតឡើង គឺពួកជ្រុលនិយមថៃ និងយោធាថៃមួយចំនួន នឹងរករឿងធ្វើបាបពលករខ្មែរយើង ដែលបន្តធ្វើការនៅថៃ»។ សម្តេចតេជោ ហ៊ុន សែន បញ្ជាក់ផងដែរថា អ្នកណាក៏ដោយឱ្យតែជាខ្មែរ ទោះបីមាន ឬគ្មានឯកសារ ក៏រាជរដ្ឋាភិបាល ទទួលយកបានទាំងអស់ដោយគ្មានការរើសអើង។ នេះបើតាមការចុះផ្សាយនៅលើគេហទំព័រហ្វេសប៊ុករបស់ សម្តេចតេជោ ហ៊ុន សែន នាថ្ងៃទី១៤ ខែមិថុនា ឆ្នាំ២០២៥៕