ភ្នំពេញ៖ ក្រុមហ៊ុន World Citi Group បានចុះអនុស្សារណៈនៃការយោគយល់គ្នា (MoU) ជាមួយសាកលវិទ្យាល័យអាស៊ីអឺរ៉ុប ដើម្បីស្វែងរកឱកាសវិនិយោគ ព្រមទាំងពង្រីកអាជីវកម្មនៅក្នុងវិស័យអប់រំ និងបណ្តុះបណ្តាលវិជ្ជាជីវៈ ជាពិសេសក្នុងវិស័យសុខាភិបាល។ នេះបើយោតាមការចុះផ្សាយរបស់សម្ដេចធិបតី ហ៊ុន ម៉ាណែត នាថ្ងៃទី១១ ខែកុម្ភៈ ឆ្នាំ២០២៥។

ក្នុងជំនួបជាមួយសម្ដេចធិបតី ហ៊ុន ម៉ាណែត នៅទីក្រុងម៉ានីល ប្រទេសហ្វីលីពីន លោកបណ្ឌិត Raymond Patrick V. Guico ប្រធានក្រុមហ៊ុន World Citi Group បានបង្ហាញអំពីចក្ខុវិស័យនៃការអភិវឌ្ឍវិស័យអប់រំផ្នែកសុខាភិបាល នៅកម្រិតឧត្តមសិក្សាឱ្យមានភាពរីកចម្រើន និងឈានមុខគេនៅក្នុងតំបន់អាស៊ីនាពេលអនាគត តាមរយៈការចាប់ដៃគូជាមួយវិនិយោគិនកម្ពុជា។

ក្នុងជំនួបនេះ សម្ដេចធិបតី ហ៊ុន ម៉ាណែត បានលើកឡើងថា កម្ពុជា មានតម្រូវការខ្ពស់ចំពោះអ្នកជំនាញផ្នែកសុខាភិបាល ជាពិសេសគិលានុបដ្ឋាយិកាសម្រាប់បម្រើ និងផ្ដល់សេវាសុខាភិបាលជូនដល់ប្រជាពលរដ្ឋ រួមទាំងជនចាស់ជរា។ ជាមួយគ្នានេះ សម្ដេចធិបតី ហ៊ុន ម៉ាណែត បានលើកទឹកចិត្តឱ្យក្រុមហ៊ុនបន្ត សហការជាមួយនឹងដៃគូក្នុងស្រុក ក៏ដូចជាក្រសួង-ស្ថាប័នពាក់ព័ន្ធ ជាពិសេសក្រសួងសុខាភិបាល ក្នុងការកំណត់គុណភាព និងស្ដង់ដារច្បាស់លាស់ក្នុងការអភិវឌ្ឍធនធានមនុស្សផងដែរ៕