ភ្នំពេញ៖ ឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានលើកឡើងថា បច្ចុប្បន្ន ប្រទេសកម្ពុជាមានក្រុមហ៊ុន និងសិប្បកម្មផលិតជីសរីរាង្គខ្នាតមធ្យមជាង១០ ដែលកំពុងផលិតជីសរីរាង្គក្នុងស្រុក ក្នុងបរិមាណជាង ៤ម៉ឺនតោនក្នុងមួយឆ្នាំ ដើម្បីផ្គត់ផ្គង់ដល់ប្រជាកសិករ។ នេះបើតាមការចុះផ្សាយរបស់ក្រសួងកសិកម្ម កាលពីថ្ងៃទី០៤ ខែមករា ឆ្នាំ២០២៥។

ក្នុងឱកាសដឹកនាំក្រុមការងារចុះត្រួតពិនិត្យក្រុមហ៊ុនផលិតជីសរីរាង្គ នៅក្នុងខេត្តពោធិ៍សាត់ និងបន្ទាយមានជ័យ ឯកឧត្តម គង់ ច័ន្ទវាសនា បានលើកទឹកចិត្តដល់ម្ចាស់ក្រុមហ៊ុន និងសិប្បកម្មជីសរីរាង្គក្នុងស្រុក ឱ្យបន្តផលិតស្របតាមស្តង់ដារបច្ចេកទេស ដើម្បីធានាគុណភាព និងចែកចាយក្នុងតម្លៃសមរម្យជូនប្រជាកសិករប្រើប្រាស់កាន់តែទូលំទូលាយ។

ឯកឧត្តម គង់ ច័ន្ទវាសនា ក៏បានបង្ហាញការសប្បាយចិត្តដែលកូនខ្មែរមានសមត្ថភាពក្នុងការបង្កើតសិប្បកម្ម ឬរោងចក្រផលិតជីសរីរាង្គក្នុងស្រុក ដែលជួយបង្កើតការងារ ដោះស្រាយបញ្ហាបរិស្ថាន កាត់បន្ថយការប្រើប្រាស់ជីគីមីនាំចូលពីបរទេស កាត់បន្ថយថ្លៃដើមផលិត និងជួយបង្កើនប្រាក់ចំណេញសម្រាប់ប្រជាកសិករ៕