ភ្នំពេញ៖ ចំណាយមូលធន ត្រូវបានគ្រោងចំនួន៤០០ប៊ីលានរៀល មានសមាមាត្រ៨,០%នៃចំណាយ មូលធន ដោយហិរញ្ញប្បទានក្នុងប្រទេសត្រូវជា ០,១៩% នៃផ.ស.ស. ឬថយចំនួន២៥,២% ធៀបនឹង ច្បាប់ហិរញ្ញវត្ថុឆ្នាំ២០២៤។ នេះបើតាមសេចក្តីព្រាងច្បាប់ ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥ របស់រាជរដ្ឋាភិបាល។

គម្រោងចំណូលចំណាយរបស់រដ្ឋបាលរាជធានី ខេត្ត ក្រុង ស្រុក និងឃុំ សង្កាត់ បានធ្វើឱ្យមានឱនភាពថវិកាចំនួន១ ៨៦៩ប៊ីលានរៀល ត្រូវជា០,៨៩% នៃផ.ស.ស. ហើយត្រូវបានគ្រោងឧបត្ថម្ភធនបំពេញតុល្យភាពដោយថវិកាថ្នាក់ជាតិ ដូចជា៖ ១. ឧបត្ថម្ភរាជធានី ខេត្ត (សម្រាប់ រដ្ឋបាលខណ្ឌ) ចំនួន១៣ប៊ីលានរៀល ថយចំនួន១៤,០% ធៀបនឹងច្បាប់ហិរញ្ញវត្ថុឆ្នាំ២០២៤, ២.ឧបត្ថម្ភមូលនិធិក្រុង ស្រុក ចំនួន៥៥៩ប៊ីលានរៀល កើនចំនួន១,០% ធៀបនឹងច្បាប់ហិរញ្ញវត្ថុឆ្នាំ២០២៤។

៣. ឧបត្ថម្ភមូលនិធិឃុំ សង្កាត់ចំនួន១ ០០៩ប៊ីលានរៀល កើនចំនួន១២,៨% ធៀបនឹងច្បាប់ហិរញ្ញវត្ថុ ឆ្នាំ២០២៤ និង៤.មូលនិធិអភិវឌ្ឍន៍ឃុំ សង្កាត់ចំនួន២៨៨ប៊ីលានរៀល កើនចំនួន១២,៨% ធៀបនឹងច្បាប់ហិរញ្ញវត្ថុឆ្នាំ២០២៤ ដែលជាការផ្ទេរធនធានបន្ថែមពីលើមូលនិធិឃុំ សង្កាត់ ជូនរដ្ឋបាលឃុំ សង្កាត់ សម្រាប់ចំណាយអភិវឌ្ឍន៍មូលដ្ឋាន។

ការឧបត្ថម្ភធនបន្ថែមខាងលើនេះ នឹងធ្វើឱ្យរដ្ឋបាលឃុំ សង្កាត់នីមួយៗ ទទួលបានថវិកាសរុបជាមធ្យមប្រមាណ៧៨៥លានរៀល សមមូលនឹង១៩៣ ០០០ដុល្លារ ក្នុងនោះថវិកាសម្រាប់ផ្នែកអភិវឌ្ឍន៍មូលដ្ឋានឃុំ សង្កាត់នីមួយៗ ទទួលបានជាមធ្យមប្រមាណ ៤៥៧លានរៀល ឬសមមូលនឹង១១២ ០០០ដុល្លារ ក្នុង១ឆ្នាំ កើនឡើង១០,៩% ធៀបនឹងច្បាប់ហិរញ្ញវត្ថុឆ្នាំ២០២៤៕