ភ្នំពេញ៖ សម្ដេចធិបតី ហ៊ុន ម៉ាណែត លើកឡើងក្នុងពិធីអបអរសាទរខួប ២០ឆ្នាំនៃកម្ពុជាចូលជាសមាជិកអង្គការពាណិជ្ជកម្មពិភពលោកថា រាជរដ្ឋាភិបាល កំពុងតែចរចារធ្វើការបន្ថែមទៀតទៅលើប្រព័ន្ធហេដ្ឋារចនាសម្ព័ន្ធផ្លូវហាយវ៉េ និងផ្លូវដែក ដើម្បីបម្រើវិស័យដឹកបញ្ជូន។ សម្តេចធិបតី ហ៊ុន ម៉ាណែត ក៏បានស្នើឱ្យអ្នកឧកញ៉ា គិត ម៉េង និងឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ចរចារចុះអនុស្សរណៈយោគយល់គ្នា រឿងផ្លូវដែកនេះ ឱ្យបានឆាប់រហ័សត្រឹមចុងឆ្នាំនេះ។

សម្ដេចធិបតីនាយករដ្ឋមន្ត្រី បានបន្តថា៖ «នាថ្ងៃខាងមុខ យើងអាចពិនិត្យលទ្ធភាពរឿងផ្លូវដែកពីភ្នំពេញ ទៅទិសខាងកើតបន្ថែមទៀតដើម្បីតភ្ជាប់ ពីព្រោះផ្លូវដែកនេះ បានជួយសម្រួលដល់ការដឹកជញ្ជូន និងកាត់បន្ថយការចំណាយផងដែរ»។ សម្ដេចធិបតី ហ៊ុន ម៉ាណែត បានបញ្ជាក់ថា៖ «សម្រាប់ថវិកាក្នុងការជួសជុលផ្លូវដែកនេះ យើងមានមួយចំនួនហើយ ប៉ុន្តែយើងត្រូវសិក្សាឱ្យបានរួចរាល់ ដើម្បីកុំឱ្យចាយលុយអត់មានប្រយោជន៍ ដែលក្នុងនោះ ការជួសជុលផ្លូវដែក ចិនបានផ្តល់ឱ្យថវិកាប្រមាណ ៣០០លានយន់ ជាជំនួយឥតសំណងផងដែរ»។

សូមអញ្ជើញទស្សនាវីដេអូខ្លីអំពីប្រសាសន៍របស់សម្តេចធិបតី ហ៊ុន ម៉ាណែត ទាក់ទងនឹងការអភិវឌ្ឍហេដ្ឋារចនាសម្ព័ន្ធផ្លូវដែក ដូចតទៅ៖ https://www.youtube.com/watch?v=ohaWOVJGoK8