ភ្នំពេញ៖ ហានិភ័យពាក់ព័ន្ធនឹងមូលធនមនុស្សនិងហរិញ្ញវត្ថុ គឺជាធនធានដ៏ចាំបាច់បំផុតសម្រាប់ការអភិវឌ្ឍរដ្ឋាភិបាលឌីជីថល ការអនុវត្តគោលនយោបាយ ដំណើរការស្ថាប័ន និងការអភិវឌ្ឍវិស័យផ្សេងៗទៀត។ តាមគោលនយោបាយរដ្ឋាភិបាលឌីជីថលកម្ពុជា ២០២២-២០៣៥ ហានិភ័យពាក់ព័ន្ធនឹងមូលធនមនុស្ស និងហិរញ្ញវត្ថុ មានដូចខាងក្រោម៖

ហានិភ័យពាក់ព័ន្ធនឹងមូលធនមនុស្ស មានដូចជាកង្វះធនធានមនុស្សជំនាញ, កង្វះឆន្ទៈនិងសុចរិតភាពក្នុងអនុវត្តការងារ និងអត្រានៃការចាកចេញឬការផ្លាស់ប្តូរពីការងារមានកម្រិតខ្ពស់ ដោយសារគម្លាតចំណូលរវាងវិស័យសាធារណៈនិងឯកជន និងរវាងការងារក្នុងប្រទេសនិងក្រៅប្រទេស។ រីឯហានិភ័យពាក់ព័ន្ធផ្នែកហិរញ្ញវត្ថុវិញមានចំណុចធំៗពីរ គឺកង្វះខាតធនធានហិរញ្ញវត្ថុសម្រាប់ការវិនិយោគនិងអនុវត្តការងារ និងការប្រើប្រាស់ធនធានហិរញ្ញវត្ថុមិនមានប្រសិទ្ធភាពនិងប្រសិទ្ធផល។

រាជរដ្ឋាភិបាល ត្រូវយកចិត្តទុកដាក់លើការគ្រប់គ្រងធនធានទាំងពីរខាងលើនេះឱ្យមានប្រសិទ្ធភាពនិងប្រសិទ្ធផល និងត្រូវកាត់បន្ថយឱ្យបានជាអតិបរមានូវហានិភ័យនានាដែលអាចកើតឡើងជាយថាហេតុ។ អភិបាលកិច្ចល្អ ការបើកចំហការគោរពច្បាប់និងលិខិតបទដ្ឋានគតិយុត្តពាក់ព័ន្ធនានា និងការលើកទឹកចិត្ត គឺជាគន្លឹះសំខាន់បំផុតដែលនាំមកនូវភាពជោគជ័យក្នុងការអនុវត្តគោលនយោបាយរដ្ឋាភិបាលឌីជីថលកម្ពុជា ២០២២-២០៣៥៕