ភ្នំពេញ៖ ប្រមុខរាជរដ្ឋាភិបាល សម្រេចបង្កើត «ក្រុមការងារចំពោះកិច្ចឥណទានកាបូន សម្រាប់ធ្វើជាដៃគូពិភាក្សាការងារជាមួយវិស័យឯកជន» ជាសេនាធិការរបស់រាជរដ្ឋាភិបាល និងមានភារកិច្ចសម្របសម្រួលការងារពាក់ព័ន្ធឥណទានកាបូន។ ភារកិច្ចសម្របសម្រួលនេះ គឺដើម្បីអនុវត្តកិច្ចសហការដោយរលូនជាមួយវិស័យឯកជនប្រកបដោយតម្លាភាព ប្រសិទ្ធភាព និងមានអនុលោមភាពស្របតាមច្បាប់និងលិខិតបទដ្ឋានគតិយុត្តជាធរមាន។

សេចក្តីសម្រេច ដែលចុះអត្ថលេខាដោយ សម្តេចមហាធិបតី ហ៊ុន ម៉ាណែត កាលពីថ្ងៃទី២៧ ខែសីហា ឆ្នាំ២០២៤ បញ្ជាក់ថា ក្រុមការងារកិច្ចឥណទានកាបូននេះ មានសមាសភាព ដូចជា៖ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ជាប្រធាន, រដ្ឋលេខាធិការក្រសួងបរិស្ថាន១រូប ជាអនុប្រធាន, រដ្ឋលេខាធិការទីស្តីការគណៈរដ្ឋមន្រ្តី ១រូប ជាអនុប្រធាន, រដ្ឋលេខាធិការក្រសួងក្រសួងសេដ្ឋកិច្ច និងហិរញ្ញវត្ថុ ១រូប ជាអនុប្រធាន និងតំណាងក្រុមប្រឹក្សាអភិវឌ្ឍន៍កម្ពុជា ១រូប។ តាមការចុះផ្សាយក្រសួងបរិស្ថាន ក្រុមការងារនេះ ក៏មានសមាជិកចំនួន ៨រូប បន្ថែមទៀត។

អាស្រ័យហេតុដូចខាងលើ រដ្ឋមន្ត្រីទទួលបន្ទុកទីស្តីគណៈរដ្ឋមន្ត្រី, រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ, រដ្ឋមន្ត្រីក្រសួងបរិស្ថាន និងរដ្ឋមន្ត្រីគ្រប់ក្រសួងនិងប្រធានគ្រប់ស្ថាប័នដែលពាក់ព័ន្ធ ត្រូវទទួលបន្ទុកអនុវត្តសេចក្តីសម្រេចតាមភារកិច្ចរៀងៗខ្ចួន ចាប់ពីថ្ងៃទី២៧ ខែសីហា តទៅ។ ចំពោះ បទប្បញ្ញត្តិទាំងឡាយណាដែលផ្ទុយនឹងសេចក្តីសម្រេចនេះ ត្រូវទុកជានិរាករណ៍៕