ភ្នំពេញ៖ កម្ពុជា និងសឹង្ហបុរី បានផ្តួចផ្តើមគំនិតចង់បង្កើតបណ្តាញអគ្គិសនីអាស៊ាន (ASEAN Power Grid) ឡើងវិញ។ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានបញ្ជាក់ថា កម្ពុជា-សឹង្ហបុរី ផ្គួចផ្តើមគំនិតនេះឡើង ព្រោះកាលពី២៥ឆ្នាំមុន អាស៊ានបានដាក់គោលដៅបង្កើតបណ្តាញអគ្គិសនីអាស៊ាន ដែលភ្ជាប់ប្រទេសទាំង១០ តែមិនអាចមានលទ្ធភាពធ្វើ។

នៅក្នុងកិច្ចប្រជុំក្រុមការងារថ្នាក់រដ្ឋមន្ត្រីលើកទី១ ឯកឧត្តម កែវ រតនៈ បានបន្តថា អាស៊ានចង់បង្កើតបណ្តាញអគ្គិសនីអាស៊ាននេះឱ្យលេចចេញជារូបរាង ដើម្បីទប់ទល់ជាមួយនឹងការបម្រែបម្រួលអាកាសធាតុ ការការពារបរិស្ថាន និងការជំរុញថាមពលបៃតងឱ្យមានភាពសម្បូរនៅក្នុងអាស៊ាន ពិសេសដើម្បីទប់ថ្លៃកុំឱ្យឡើង។

តាមការចុះផ្សាយរបស់ក្រសួងរ៉ែ និងថាមពល នាថ្ងៃទី០៤ ខែមិថុនា ឆ្នាំ២០២៤ បានឱ្យដឹងថា ការបង្កើតបណ្តាញអគ្គិសនីអាស៊ាននេះ នឹងធ្វើឱ្យកម្ពុជាអាចបង្កើតចំណូលនាពេលអនាគត បង្កើតថាមពលបៃតងដែលទាក់ទាញការវិនិយោគ បង្កើតការងារដល់ប្រជាពលរដ្ឋ មានការប្រកួតប្រជែងផ្នែកសេដ្ឋកិច្ច និងមានបរិស្ថានល្អ៕https://www.youtube.com/watch?v=SzfBcsJRHVg