ភ្នំពេញ៖ គិតត្រឹមម៉ោង ៥:០០ព្រឹក នៅថ្ងៃទី៤ ខែមិថុនា ឆ្នាំ២០២៤ យុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៤ របស់មូលនិធិគន្ធបុប្ផាកម្ពុជា បានទទួលថវិកាបរិច្ចាគចំនួន ១,១៦៤,០៤៧ ដុល្លារ ពីប្រជាពលរដ្ឋចំនួន ៩៩,៩៦៥ នាក់។ នេះបើតាមការចុះផ្សាយនៅគេហទំព័រផ្លូវការរបស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នាថ្ងៃទី០៤ មិថុនា។

ក្នុងការចុះផ្សាយនោះ លោកជំទាវបណ្ឌិត ពេជ ចន្ទមុន្នី បានអរគុណចំពោះការគាំទ្រយ៉ាងផុលផុស ក្នុងស្មារតីសាមគ្គីភាព«ខ្មែរជួយខ្មែរ» របស់ប្រជាជាតិខ្មែរទាំងមូល និងបានអំពាវនាវដល់សប្បុរសជនដែលមានបំណងចូលរួមបរិច្ចាគក្នុងយុទ្ធនាការនេះ ឱ្យបន្តចូលរួមគាំទ្រ រហូតដល់ថ្ងៃបិទយុទ្ធនាការ។

គួរបញ្ជាក់ថា យុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៤ សម្រាប់កុមារកម្ពុជា គឺមានរយៈពេល ១ខែពេញ ដែលចាប់ពីថ្ងៃទី១ ដល់ថ្ងៃទី៣០ ខែមិថុនា ឆ្នាំ២០២៤ ដែលជាយុទ្ធនាការប្រចាំឆ្នាំរបស់មូលនិធិគន្ធបុប្ផាកម្ពុជារៀបចំឡើងដើម្បីបំផុសស្មារតី«ខ្មែរជួយខ្មែរ» តាមរយៈការអំពាវនាវឱ្យចូលរួមបរិច្ចាគពីសប្បុរសជនទាំងក្នុង និងក្រៅប្រទេស ដើម្បីរួមគ្នាផ្តល់ក្តីស្រលាញ់ដល់កុមារកម្ពុជា៕