ភ្នំពេញ៖ រដ្ឋាភិបាលជប៉ុន បានឯកភាពផ្តល់ជំនួយឥតសំណងចំនួន ៧៦ ៣៣៣ដុល្លារ សម្រាប់សាងសង់ដំបូលនៅទីលានបាល់បោះរទេះជនពិការ ក្នុងខេត្តបាត់ដំបង។ បើតាមការចុះផ្សាយរបស់ស្ថានទូតជប៉ុនប្រចាំកម្ពុជា នាថ្ងៃទី២១ ខែមីនា ឆ្នាំ២០២៤ ជំនួយនេះ ត្រូវបានផ្តល់ជូនសហព័ន្ធកីឡាបាល់បោះរទេះជនពិការកម្ពុជា(CWBF)។

ជំនួយឥតសំណង សម្រាប់គម្រោងទ្រង់ទ្រាយតូចវប្បធម៌គូសាណូណិ ដែលរដ្ឋាភិបាលជប៉ុនផ្តល់ឱ្យ នឹងចូលរួមចំណែកនាំឱ្យក្រុមកីឡាបាល់បោះរទេះជនពិការ ទទួលបានលទ្ធផលកាន់តែល្អប្រសើរជាងមុនក្នុងការប្រកួតអន្តរជាតិនានា និងទាក់ទាញចំណាប់អារម្មណ៍របស់មនុស្សឱ្យចូលរួមលេងកីឡាកាន់តែច្រើន ដើម្បីនាំមកនូវសង្គមដែលមានសុខភាពល្អនាពេលអនាគត។ នេះជាការលើកឡើងរបស់ ឯកអគ្គរាជទូត អ៊ូអិណុ ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំកម្ពុជា។

ជំនួយដែលនឹងលើកកម្ពស់មិត្តភាពជប៉ុន-កម្ពុជា ឱ្យកាន់តែស៊ីជម្រៅនេះ ត្រូវបានចុះហត្ថលេខា នៅថ្ងៃទី២១ ខែមីនា ដោយ លោកឯកអគ្គរាជទូត អ៊ូអិណុ អាត់ស៊ូស៊ី ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំកម្ពុជា និងអ្នកម្នាង ស៊ីសុវត្ថិ កន្ធីរ៉េត ប្រធានសហព័ន្ធកីឡាបាល់បោះរទេះជនពិការកម្ពុជា(CWBF)៕