ភ្នំពេញ៖ អគ្គនាយកដ្ឋានគយ បានបំភ្លឺថា ករណីដកហូតទូរសព្ទចំនួន ១៣១១គ្រឿងពីម្ចាស់អាជីវកម្មនៅខេត្តត្បូងឃ្មុំនេះ ជាផ្នែកមួយនៃប្រតិបត្តិការចុះត្រួតពិនិត្យអនុលោមភាពចុងទី ដែលអនុវត្តឡើងដោយការិយាល័យស្រាវជ្រាវ និងបង្ក្រាបអំពើរត់ពន្ធតំបន់៦។ តាមសេចក្តីបំភ្លឺរបស់អគ្គនាយកដ្ឋានគយ និងរដ្ឋាករកម្ពុជា បានបញ្ជាក់ថា ទូរសព្ទចំនួន ១៣១១គ្រឿង ដែលមន្ត្រីគយដកហូតនេះ គឺពុំមានបិទត្រាពន្ធគយនិងពុំមានឯកសារបញ្ជាក់ពីប្រភពស្របច្បាប់។

មន្ត្រីគយនិងរដ្ឋាករមានសមត្ថកិច្ច បានឱ្យដឹងថា ទូរសព្ទចំនួន ១៣១១គ្រឿង ដែលដកហូតបាន គឺក្នុងនោះមានទូរសព្ទស្មាតហ្វូនថ្មីចំនួន ៣៥៦គ្រឿង និងទូរសព្ទប្រើរួចចំនួន ៩៥៥គ្រឿង។ ទូរសព្ទទាំងនេះ ត្រូវបានយកមកថែរក្សាទុក ជាបណ្ដោះអាសន្ននៅទីតាំងឈរជើងរបស់ការិយាល័យស្រាវជ្រាវនិងបង្ក្រាបអំពើរត់ពន្ធតំបន់៦ ស្ថិតនៅភូមិហួច ឃុំក្រែក ស្រុកពញាក្រែក ខេត្តត្បូងឃ្មុំ ដើម្បីធ្វើកំណត់ហេតុល្មើសច្បាប់គយទៅតាមនីតិវិធី។

ចំពោះ ទូរសព្ទប្រើរួច ដែលរកឃើញថាជាទំនិញទិញដូរក្នុងស្រុក អង្គភាពគយនិងរដ្ឋាករមានសមត្ថកិច្ចនឹងប្រគល់ជូនម្ចាស់វិញ។ គយ បានបន្ថែមថា មុខទំនិញ ទូរសព្ទនេះ ត្រូវបានចាត់ជាទំនិញកំណត់ពិសេសដែលជាកម្មវត្ថុនៃការបិទត្រាពន្ធគយ។

អគ្គនាយកដ្ឋានគយ បានអំពាវនាវឱ្យគ្រប់អង្គភាព ស្ថាប័នពាក់ព័ន្ធ និងបណ្តាញសារព័ត៌មាន និងអ្នកប្រើប្រាស់បណ្តាញសង្គម ចូលរួមគាំទ្រអនុវត្តច្បាប់តាមរយៈការជួញដូរ និងប្រើប្រាស់ទំនិញដែលបានបំពេញកាតព្វកិច្ចពន្ធនិងអាករត្រឹមត្រូវ ដើម្បីចូលរួមលើកកម្ពស់វប្បធម៌សារពើពន្ធនៅកម្ពុជា៕