ភ្នំពេញ៖ ឃ្លាំងស្តុកទុក រានហាលសម្ងួត ម៉ាស៊ីនជ្រើសរើសគុណភាពគ្រាប់ និងមាស៊ីនវាស់សំណើមគ្រាប់ស្វាយចន្ទី មានតម្លៃសរុបជិត ២៣ម៉ឺនដុល្លារ ត្រូវបានផ្តល់ជូនសហគមន៍ស្វាយចន្ទីចំនួន៤ ក្នុងខេត្តរតនគីរី កាលពីថ្ងៃទី២៨ ខែឧសភា ឆ្នាំ២០២៤។ នេះបើតាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទ។

សហគមន៍ស្វាយចន្ទីចំនួន៤ ដែលទទួលបានឃ្លាំងស្តុកទុក រានហាល និងម៉ាស៊ីនទាំងនេះ រួមមាន សហគមន៍កសិកម្មចម្រុុះធួយទុំរតនៈ សហគមន៍កសិកម្មចម្រុះរតនល្អឺនក្រែន សហគមន៍កសិកម្មចាងរ៉ា និងសហគមន៍កសិកម្មអភិវឌ្ឍន៍លុងឃុង។ ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម លើកឡើងថា គម្រោងនេះ នឹងធ្វើឱ្យប្រជាកសិករមានជម្រើសស្តុកទុកគ្រាប់ស្វាយចន្ទីក្រោយពេលប្រមូលផល និងរងចាំលក់ចេញវិញនៅពេលដែលទទួលបានតម្លៃល្អពីទីផ្សារ។ នេះជាអត្ថប្រយោជន៍បន្ថែមពីលើការទទួលបានការគាំទ្រខាងផ្នែកបច្ចេកទេស ទីផ្សារ និងទុន នៃការចូលរួមផលិតក្រោមទម្រង់ជាសហគមន៍។

ក្នុងកម្មវិធីសម្ពោធប្រគល់-ទទួលសម្ភារបរិក្ខារទាំងនេះ ឯកឧត្តម ឃឹម ហ្វីណង់ សង្ឃឹមថាកសិករក្នុងសហគមន៍ទាំង ៤ខាងលើ នឹងថែរក្សាប្រើប្រាស់ទ្រព្យសម្បត្តិរួម ដែលទទួលបានពីគម្រោងគូសាណូណិ ជាជំនួយឥតសំណងពីស្ថានទូតជប៉ុន ក្នុងគម្រោងកែលម្អប្រតិបត្តិការក្រោយការប្រមូលផលគ្រាប់ស្វាយចន្ទីនេះ ឱ្យបានជាប្រយោជន៍រួមគង់វង្សយូរអង្វែង។ សហគមន៍កសិកម្មទាំង៤ បានថ្លែងអំណរគុណដល់ស្ថានទូតជប៉ុនប្រចាំនៅកម្ពុជា ដែលបានផ្តល់សម្ភារបរិក្ខារទាំងនេះមកសហគមន៍ ដើម្បីជាធាតុដ៏សំខាន់ក្នុងខ្សែច្រវាក់កែច្នៃគ្រាប់ស្វាយចន្ទីប្រកបដោយប្រសិទ្ធភាព និងប្រសិទ្ធផលខ្ពស់៕