ភ្នំពេញ៖ រាជរដ្ឋាភិបាល តាមរយៈរដ្ឋមន្រ្តីក្រសួងពាណិជ្ជកម្ម បានលើកទឹកចិត្តឱ្យសហគ្រាសធុនតូច និងមធ្យម (SMEs) និងក្រុមហ៊ុននៅកម្ពុជា ដាក់លក់ផលិតផលខ្មែរ ដោយប្រើប្រាស់ផ្សារពាណិជ្ជកម្មខេមបូឌាត្រេដ ឥតគិតថ្លៃ និងទីផ្សារពាណិជ្ជកម្ម Alibaba.com ដើម្បីជំរុញការនាំចេញផលិតផលខ្មែរទៅកាន់ទីផ្សារអន្តរជាតិ។

លើសពីជំរុញការលក់ផលិតផលខ្មែរទៅកាន់ទីផ្សារក្រៅស្រុក ការដាក់លក់ផលិតផលខ្មែរនៅលើគេហទំព័រ Alibaba.com ក៏នឹងជំរុញបន្ថែមនូវការប្រើប្រាស់ថ្នាលពាណិជ្ជកម្មតាមប្រព័ន្ធអេឡិចត្រូនិក កិត្តិនាមផលិតផលកម្ពុជា ឱ្យកាន់តែមានភាពប្រកួតប្រជែង មានការទទួលស្គាល់ពីគុណភាព ស្តង់ដាពីអ្នកប្រើប្រាស់អន្តរជាតិ និងការធ្វើពិពិធកម្មសេដ្ឋកិច្ចក្នុងទីផ្សារអន្តរជាតិ។ នេះជាការលើកឡើងបន្ថែមរបស់ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម ក្នុងសិក្ខាសាលាស្តីពី «លើសពីទីផ្សារកម្ពុជា៖ ការនាំយកផលិតផលកម្ពុជាទៅកាន់ទីផ្សារអន្តរជាតិ តាមរយៈ Alibaba.com»។

ក្នុងសិក្ខាសាលា ដែលធ្វើឡើងកាលពីថ្ងៃទី២៧ ខែឧសភា ឆ្នាំ២០២៤ បានឆ្លុះបញ្ចាំងពីកិច្ចសហការរវាងរដ្ឋ និងវិស័យឯកជន ក្នុងការលើកកម្ពស់ផលិតផលកម្ពុជា និងនាំចេញទៅកាន់ទីផ្សារអន្តរជាតិ ពិសេសការធ្វើប្រតិបត្តិការតាមរយៈពាណិជ្ជកម្មតាមប្រព័ន្ធអេឡិចត្រូនិក។ ជាមួយគ្នានេះ ក្រសួងពាណិជ្ជកម្ម និងក្រុមហ៊ុន Alibaba នឹងសហការបើកពន្លាជាតិកម្ពុជា នៅក្នុងទីផ្សារពាណិជ្ជកម្ម Alibaba.com នៅខែកញ្ញាខាងមុខ ក្នុងព្រឹត្តការណ៍អម ពិព័រណ៍ចិន-អាស៊ានលើកទី២១ នៅតំបន់ស្វយ័តក្វាងស៊ី ប្រទេសចិន។

គួរជម្រាបថា ក្រសួងពាណិជ្ជកម្ម និងក្រុមហ៊ុន Alibaba បានចុះអនុស្សារណៈនៃការយោគយល់ (MOU) កាលពីថ្ងៃទី១៧ ខែតុលា ឆ្នាំ២០២៣ ដើម្បីដាក់លក់ដោយត្រង់នូវផលិតផលកម្ពុជាលើទីផ្សារចិន ក៏ដូចជាបណ្តាប្រទេសអាស៊ាន តាមរយៈថ្នាលពាណិជ្ជកម្មសកលតាមប្រព័ន្ធអេឡិចត្រូនិក-Platform eWTP ៕