ភ្នំពេញ៖ កំពង់ផែពហុបំណងកំពតដែលមានតម្លៃ ១,៣ពាន់លានដុល្លារ របស់ក្រុមហ៊ុនកំពតផត (KAMPOT PORT Co., Ltd.) នឹងត្រៀមរៀបចំពិធីសម្ពោធបើកឱ្យដំណើរការជាផ្លូវការនៅថ្ងៃទី០៦ ខែមិថុនា ឆ្នាំ២០២៤ ក្រោមអធិបតីភាពរបស់សម្តេចធិបតី ហ៊ុន ម៉ាណែត។ នេះបើតាមការចុះផ្សាយរបស់ក្រសួងសាធារណការ និងដឹកជញ្ជូន នាថ្ងៃទី២៤ ឧសភា។

ក្នុងកិច្ចប្រជុំពិនិត្យវឌ្ឍនភាពការងារត្រៀមរៀបចំពិធីសម្ពោធកំពង់ផែពហុបំណងកំពតនេះ ក្នុងគោលបំណងដើម្បីពិនិត្យវឌ្ឍនភាពការងាររបស់គណៈកម្មការ និងអនុគណៈកម្មការនីមួយៗ ពិសេសពិនិត្យមើលការងារផ្សេងៗដែលនៅសេសសល់។

ឯកឧត្តម អៀង វ៉េងស៊ុន រដ្ឋលេខាធិការ ក្រសួងសាធារណការ និងដឹកជញ្ជូន បានលើកឡើងថា សមាជិក សមាជិកានៃគណៈកម្មការ និងអនុគណៈកម្មាការទាំងអស់ ត្រូវសហការគ្នាជាមួយភាគីពាក់ព័ន្ធ ដើម្បីផ្តល់ព័ត៌មានទៅវិញទៅមកឱ្យបានគ្រប់ជ្រុងជ្រោយ ដើម្បីឱ្យពិធីសម្ពោធខាងមុខអាចប្រព្រឹត្តទៅបានដោយរលូន ប្រកបដោយសន្តិសុខ សុវត្ថិភាព សណ្តាប់ធ្នាប់។ គួរបញ្ជាក់ថា កំពង់ផែពហុបំណងកំពត ត្រូវបានបើកការដ្ឋានសាងសង់នៅថ្ងៃទី៥ ខែឧសភា ឆ្នាំ២០២២ ដែលស្ថិតនៅក្នុងក្រុងបូកគោ ខេត្តកំពត៕