ភ្នំពេញ៖ ក្រុមហ៊ុន ហ្គ័រស៊ីងគ្រុប គ្រោងសហការជាមួយដៃគូវិនិយោគចិន ដែលមានបទពិសោធន៍ក្នុងវិស័យឧស្សាហកម្ម និងកសិកម្ម ដើម្បីបង្កើតការវិនិយោគថ្មីៗនៅកម្ពុជា លើការវិនិយោគលើផ្នែកសិកម្ម, ផ្នែកដឹកជញ្ជូន នាំចេញ-នាំចូល, និងគ្រោងបង្កើតសួនឧស្សាហកម្ម និងតំបន់សេដ្ឋកិច្ចពិសេស ផងដែរ។ នេះបើយោងតាមការចុះផ្សាយរបស់ ក្រុមប្រឹក្សាអភិវឌ្ឍន៍កម្ពុជា នាថ្ងៃទី១៣ ខែសីហា ឆ្នាំ២០២៥។

ក្នុងជំនួបជាមួយឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ឧកញ៉ា លី ហ្គួលាន ប្រធានក្រុមប្រឹក្សាភិបាលក្រុមហ៊ុន ហ្គ័រស៊ីងគ្រុប បានលើកឡើង អំពីសាវតានៃការចាប់ផ្តើមការវិនិយោគនៅកម្ពុជា ដោយឧកញ៉ា លី ហ្គួលាន គូរបញ្ជាក់ថាបច្ចុប្បន្នភាពនៃដំណើរប្រតិបត្តិការរបស់ក្រុមហ៊ុនដែលស្ថិតនៅក្រោមការគ្រប់គ្រងរបស់ហ្គ័រស៊ីងគ្រុប គឺកំពុងវិនិយោគលើ រោងចក្រឧស្សាហកម្មកែច្នៃក្តារបន្តះពីដើមកៅស៊ូ, ក្រុមហ៊ុននាំចេញនាំចូលគ្រឿងសំណង់, និងក្រុមហ៊ុនសាងសង់។

ជាមួយគ្នានេះ ឯកឧត្តម ស៊ុន ចាន់ថុល សម្តែងនូវការស្វាគមន៍ចំពោះចំណាប់អារម្មណ៍លើការពង្រីកវិសាលភាពវិនិយោគនៅកម្ពុជា និងបានលើកឡើងពីវិស័យសក្កានុពលនានាបន្ថែមទៀត ដែលមានភាពអំណោយផលខ្ពស់ដល់វិនិយោគិនបរទេស រួមមាន៖ ឧស្សាហកម្មគ្រឿងអេឡិចត្រូនិក, ឧស្សាហកម្មកែច្នៃចំណីអាហារ និងគ្រឿងឧបភោគបរិភោគ, និងឧស្សាហកម្មពាក់ព័ន្ធនឹងគ្រឿងបង្គុំរថយន្ត ជាដើម។

ឯកឧត្តម ស៊ុន ចាន់ថុល គូរបញ្ជាក់ថាក្រុមប្រឹក្សាអភិវឌ្ឍន៍កម្ពុជា ជាសេនាធិការច្រកចេញចូលតែមួយរបស់រាជរដ្ឋាភិបាលកម្ពុជា លើការងារវិនិយោគ រីករាយក្នុងការផ្តល់ការណែនាំ ការសម្របសម្រួល សំដៅធ្វើឱ្យការសម្រេចចិត្តវិនិយោគ កាន់តែមានភាពច្បាស់លាស់ត្រឹមត្រូវ។ ដូចនេះ ឯកឧត្តមឧបនាយករដ្ឋមន្ត្រី បានលើកទឹកចិត្តឱ្យឧកញ៉ាប្រធានក្រុមប្រឹក្សាភិបាល ប្រើប្រាស់នូវប្រព័ន្ធគ្រប់គ្រងគម្រោងវិនិយោគកម្ពុជា cdcIPM ក្នុងការដាក់ពាក្យស្នើសុំវិនិយោគ៕