ភ្នំពេញ៖ សហគមន៍កសិកម្មទំនើបដំណាំស្វាយចន្ទីចំនួន៣ នៅក្នុងខេត្តកំពង់ធំ ចុះហត្ថលេខាលើកិច្ចសន្យាស្តីពី «ការផលិត និងផ្គត់ផ្គង់គ្រាប់ស្វាយចន្ទី» ជាមួយក្រុមហ៊ុន MIRARTH ដើម្បីផ្គត់ផ្គង់គ្រាប់ស្វាយចន្ទី ៤០០តោន ក្នុងតម្លៃថេរមួយសម្រាប់រដូវកាលប្រមូលផលដំបូងរបស់សហគមន៍ ដែលមានទំហំទឹកប្រាក់ប្រមាណ ៦៥ម៉ឺនដុល្លារ។ នេះបើតាមការចុះផ្សាយរបស់ ក្រសួងកសិកម្ម រុក្ខាប្រមាញ់ និងនេសាទ។

ក្នុងពិធីចុះកិច្ចសន្យា កាលពីថ្ងៃទី២៦ ខែមីនា ឆ្នាំ២០២៥ ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានណែនាំឱ្យនាយកដ្ឋានកសិឧស្សាហកម្ម និងសហគមន៍ បន្តចុះកិច្ចសន្យាលក់គ្រាប់ស្វាយចន្ទីបន្ថែមទៀត រហូតដល់ចប់រដូវប្រមូលផល ព្រមទាំងពិចារណាស្តុកទុកក្នុងកម្រិតណាមួយ សម្រាប់លក់ជាគ្រាប់ស្ងួតផងដែរ។ បន្ថែមពីនេះ ឯកឧត្តម ឃឹម ហ្វីណង់ ណែនាំឱ្យសហគមន៍កសិកម្មទំនើប ត្រៀមធ្វើកិច្ចសន្យាជាមួយក្រុមហ៊ុនសម្រាប់រដូវកាលបន្ទាប់ ដើម្បីទទួលទិញពីដើមរដូវទុកឱ្យហើយ។

សហគមន៍កសិកម្មទំនើបដំណាំស្វាយចន្ទីទំនើបទាំង៣ រួមមានសហគមន៍កសិកម្មទំនើបប្រាសាទសំបូររុងរឿង សហគមន៍កសិកម្មទំនើបសាលាវិស័យកំពង់ធំ និងសហគមន៍កសិកម្មទំនើបទំរីងកំពង់ធំ។ បើតាមការព្យាករណ៍ បរិមាណគ្រាប់ស្វាយចន្ទី ដែលបានចុះកិច្ចសន្យានេះ មានចំនួនប្រហាក់ប្រហែលនឹង២០% នៃបរិមាណផលសរុប ដែលសហគមន៍ទាំង៣ គ្រោងនឹងផលិតបានក្នុងឆ្នាំ២០២៥ នេះ៕