ភ្នំពេញ៖ ក្នុងរយៈពេល ៥ខែ ក្នុងឆ្នាំ២០២៤ កម្ពុជា បានអនុម័តគម្រោងវិនិយោគចំនួន ១៤៧គម្រោងដែលមានទុនវិនិយោគ ២,៧ពាន់លានដុល្លារ និងអាចបង្កើតឱកាសការងារជាង ១៤ម៉ឺនកន្លែង។ នេះជាការលើកឡើងរបស់សម្តេចធិបតី ហ៊ុន ម៉ាណែត នៅក្នុងឱកាសជួបសំណេះសំណាលជាមួយបងប្អូន សហគមន៍ខ្មែរ រស់នៅសាធារណរដ្ឋកូរ៉េ កាលពីថ្ងៃទី១៨ ខែឧសភា ឆ្នាំ២០២៤។

ក្នុងឱកាសនេះ សម្តេចធិបតី ហ៊ុន ម៉ាណែត បានបញ្ជាក់ថា៖ « គម្រោងចំនួន១៤៧នេះ គឺគិតចាប់ពីដើមខែមករា មកដល់ខែឧសភា ដែលក្នុងនោះមានទាំងការវិនិយោគរបស់ក្រុមហ៊ុនក្នុងស្រុក និងក្រុមហ៊ុនក្រៅស្រុក ដែលបានមកដាក់ទុនវិនិយោគនៅកម្ពុជា»។

ជាមួយគ្នានេះ សម្តេចធិបតី ហ៊ុន ម៉ាណែត សង្ឃឹមថា ដំណើរទស្សនកិច្ច រយៈពេល៤ថ្ងៃ នៅសាធារណរដ្ឋកូរ៉េនេះ នឹងនាំវិនិយោគិនដែលមានបំណងវិនិយោគនៅកម្ពុជា មកដាក់ទុនវិនិយោគនៅក្នុងប្រទេសកម្ពុជាកាន់តែច្រើនបន្ថែមទៀត។ គួរបញ្ជាក់ថា ដំណើរទស្សនកិច្ចនេះ ក្នុងគោលបំណងបន្តពង្រឹងចំណងមិត្តភាពជាមួយប្រទេសក្នុងតំបន់អាស៊ាន និងសកលដោយពង្រីកនូវកិច្ចសហប្រតិបត្តិការលើគ្រប់វិស័យ ដើម្បីឧត្តមប្រយោជន៍ជាតិ និងប្រជាជន៕