ភ្នំពេញ៖ ក្រុមហ៊ុន Smart Eden របស់ប្រទេសបារាំង គ្រោងទទួលទិញផលិតផលចំណីអាហារ និងកសិផលរបស់កម្ពុជា ដូចជាគ្រាប់ស្វាយចន្ទី ដំណាប់ស្វាយ ស្ករត្នោត និងម្រេចជាដើម ដើម្បីនាំចេញទៅកាន់ទីផ្សាររបស់ប្រទេសបារាំង និងសហគមន៍អឺរ៉ុប។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី១៧ ខែតុលា ឆ្នាំ២០២៤។

ក្នុងកិច្ចពិភាក្សាការងារជាមួយ អ្នកឧកញ៉ា ហ៊ុន ឡាក់ សមាជិកក្រុមប្រឹក្សាភិបាល និងជាអគ្គលេខាធិការនៃសមាគមឧកញ៉ាកម្ពុជា និងលោក Laurent Strauch នាយកប្រតិបត្តិក្រុមហ៊ុន Smart Eden ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានជូនពរឱ្យការវិនិយោគនាំចេញនេះ សម្រេចបានជោគជ័យ ដើម្បីចូលរួមជំរុញការនាំចេញ បង្កើនវត្តមានផលិតផល និងកសិផលរបស់កម្ពុជា ក្នុងទីផ្សារអន្តរជាតិ។

ក្នុងជំនួបកាលពីថ្ងៃទី១៧ ខែតុលា ឆ្នាំ២០២៤ ឯកឧត្តម ស៊ុន ចាន់ថុល ក៏បានជំរុញឱ្យក្រុមហ៊ុនឯកជន Smart Eden ពិនិត្យលទ្ធភាពបន្តវិនិយោគកែច្នៃកសិផលផ្សេងៗទៀត ដែលមានសក្ដានុពលក្នុងការនាំចេញ ក្នុងទិសដៅបង្កើតការងារក្នុងស្រុកបន្ថែម និងប្រើប្រាស់ឱ្យអស់ពីលទ្ធភាពនូវកសិផលដែលកម្ពុជាផលិតបាន៕