ភ្នំពេញ៖ កម្ពុជា ស្នើឱ្យក្រុមហ៊ុនវិនិយោគមកពីខេត្ត Yunnan ប្រទេសចិន វិនិយោគលើការកែច្នៃកសិផលកម្ពុជាសម្រាប់ផ្គត់ផ្គង់ទីផ្សារក្នុងស្រុក និងក្រៅស្រុក តាមរយៈការប្រើប្រាស់បច្ចេកវិទ្យាទំនើប និងមានតម្លៃបន្ថែមខ្ពស់។ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជាលើកឡើងដូច្នេះ ទៅកាន់លោក Liu Jie អនុប្រធានមន្ទីរពាណិជ្ជកម្មនៃខេត្ត Yunnan។

នាឱកាសទស្សនកិច្ចសិក្សានៅកម្ពុជា ដើម្បីស្វែងយល់ឱ្យកាន់តែច្បាស់អំពីបរិយាកាស និងសក្តានុពលវិនិយោគនៅកម្ពុជា លោក Liu Jie អនុប្រធានមន្ទីរពាណិជ្ជកម្មនៃខេត្ត Yunnan ក៏បានបញ្ជាក់ថា លោកមានបំណងចូលរួមផ្សព្វផ្សាយ និងទាក់ទាញវិនិយោគិនចិនមកកម្ពុជា ពិសេសការវិនិយោគមកពីខេត្ត Yunnan។ ឯកឧត្តម ជា វុទ្ធី លើកឡើងថា ដំណើរទស្សនកិច្ចរបស់គណៈប្រតិភូក្រុមហ៊ុនចិន ក៏ជាផ្នែកមួយនៃកិច្ចសហប្រតិបត្តិការមេគង្គ-ឡាងឆាង ដើម្បីជំរុញការវិនិយោគ និងពាណិជ្ជកម្មរវាងប្រទេសទាំងពីរ គឺកម្ពុជា-ចិន ផងដែរ។

គួរបញ្ជាក់ថា ក្រុមហ៊ុនវិនិយោគចិន ដែលមកទស្សនកិច្ចនៅកម្ពុជា នាថ្ងៃទី២៥ ខែកញ្ញា ឆ្នាំ២០២៤នេះ គឺមានសកម្មភាពវិនិយោគក្នុងវិស័យថាមពល បច្ចេកវិទ្យាឌីជីថល ពាណិជ្ជកម្មអេឡិចត្រូនិក កសិកម្ម កសិឧស្សាហកម្ម ផលិតកម្មម្ហូបអាហារ និងការផ្តល់សេវាប្រឹក្សាពាក់ព័ន្ធនឹងការវិនិយោគ។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា៕