ភ្នំពេញ៖ វេទិកាសម្ព័ន្ធឧស្សាហកម្មនៃប្រទេសកូរ៉េ (KIAF) ដែលមានក្រុមហ៊ុនប្រមាណ៤០ កំពុងវិនិយោគលើវិស័យវាយនភណ្ឌនៅកម្ពុជា មានបំណងពង្រីកប្រតិបត្តិការអាជីវកម្ម និងវិនិយោគលើវិស័យគ្រឿងសង្ហារឹម វិស្វកម្ម និងយានយន្តនៅក្នុងប្រទេសកម្ពុជា។ នេះជាការលើកឡើងរបស់លោក MARN Ki-jeong ប្រធានវេទិកាសម្ព័ន្ធឧស្សាហកម្មនៃប្រទេសកូរ៉េ (KIAF) កាលពីថ្ងៃទី១៧ ខែឧសភា ឆ្នាំ២០២៤។

ក្រៅពីគម្រោងវិនិយោគបន្ថែមនៅកម្ពុជា វេទិកាសម្ព័ន្ធឧស្សាហកម្ម ក៏គ្រោងរៀបចំវេទិកាធុរកិច្ចកូរ៉េ-កម្ពុជា នៅ ភ្នំពេញ ដែលនឹងមានការចូលរួមពីវិនិយោគិនកូរ៉េលើវិស័យជាច្រើន។ វេទិកា ដែលនឹងធ្វើឡើងក្នុងខែវិច្ឆិកា ឆ្នាំ២០២៤ ខាងមុខនេះ នឹងក្លាយជាឱកាសក្រុមហ៊ុនកូរ៉េពង្រីកការវិនិយោគ និងធ្វើកិច្ចសហការជាមួយដៃគូវិនិយោគនានាក្នុងប្រទេសកម្ពុជា។ លោកប្រធាន KIAF បានលើកឡើងបន្ថែមបែបនេះ ក្នុងជំនួបពិភាក្សាការងារ ជាមួយសម្តេចធិបតី ហ៊ុន ម៉ាណែត ក្នុងឱកាសបំពេញទស្សនកិច្ចផ្លូវការ នៅទីក្រុងសេអ៊ូល សាធារណរដ្ឋកូរ៉េ។

នាឱកាសនោះ សម្ដេចធិបតីនាយករដ្ឋមន្រ្តី បានគាំទ្របំណងវិនិយោគខាងលើនេះ និងបានបញ្ជាក់ពីការដាក់ចេញគោលនយោបាយ និងលិខិតបទដ្ឋានគតិយុត្តិគាំទ្រដល់ការវិនិយោគ តាមរយៈការធានាបរិយាកាសវិនិយោគ ដែលមានភាពប្រកួតប្រជែង ដូចជាការដាក់ឱ្យអនុវត្តច្បាប់ថ្មីស្ដីពីវិនិយោគដើម្បីផ្ដល់ការលើកទឹកចិត្តបន្ថែមទៀតដល់ការវិនិយោគនៅកម្ពុជា ដល់លោក MARN Ki-jeong ផងដែរ៕