ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ណែនាំឱ្យសហគមន៍កសិកម្មទំនើបសសី ក្នុងខេត្តសៀមរាប ចាប់ផ្តើមសាកល្បងធ្វើផ្ទះសំណាញ់នៅក្បែរទឹក និងងាយស្រួលចុះប្រមូលទិញ។ តាមការចុះផ្សាយរបស់ក្រសួងកសិកម្ម កាលពីថ្ងៃទី៨ ខែឧសភា ឆ្នាំ២០២៤។

ឯកឧត្តម ឌិត ទីណា បានលើកឡើងថា ដោយសារបញ្ហាខ្វះទឹក និងមិនទាន់អាចវាយតម្លៃអំពីប្រភេទដំណាំដែលមានសក្តានុពលនៅលើដីនេះ ដូច្នេះ ទាមទារឱ្យធ្វើតាមទម្រង់ដែលអាចធ្វើទៅរួច និងមិនប្រថុយប្រថាន រួមទាំងអាចគ្រប់គ្រងបាន។ ការចុះទៅពិនិត្យស្ថានភាពទីតាំងដីផលិតកម្មសហគមន៍នេះ ដើម្បីឈ្វេងយល់ពីបទពិសោធប្រតិបត្តិការរបស់ក្រុមបណ្តុំ មុនចងក្រងជាសហគមន៍កសិកម្មទំនើប។

ឯកឧត្តម ឌិត ទីណា ក៏បានបន្តថា សហគមន៍កសិកម្មទំនើបសសី ត្រូវពិនិត្យឡើងវិញ និងកែសម្រួលផែនការវិនិយោគរបស់សហគមន៍ទំនើបទៅតាមស្ថានភាពពិតរបស់សហគមន៍ និងត្រូវយកចិត្តទុកដាក់បន្ថែមលើការចូលរួមរបស់សហគមន៍ កម្លាំងសមាជិក និងការគ្រប់គ្រងឱ្យបានល្អ ដើម្បីធានាភាពជោគជ័យ ផ្តល់ផលចំណេញដល់សមាជិកស្របតាមគោលដៅនៃកម្មវិធីគោលនយោបាយ៕