ភ្នំពេញ៖ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានលើកឡើងថា មជ្ឈមណ្ឌលឧត្តមភាពយានយន្តនៅកម្ពុជា (ACEC) នឹងជំរុញ TVET នៅកម្ពុជាកាន់តែមានគុណភាព និងប្រសិទ្ធភាព សំដៅទាក់ទាញ និងជំរុញការវិនិយោគវិស័យឧស្សាហកម្មយានយន្ត ហើយក៏ជាមូលដ្ឋានចាំបាច់សម្រាប់វិស័យដទៃទៀត នឹងរួមចំណែកដល់ការបង្កើតការងារ ការបង្កើនប្រាក់ចំណូល និងការលើកកម្ពស់កំណើនផលិតភាពការងារ ពិសេសការធ្វើពិពិធកម្មមូលដ្ឋាននៃកំណើនសេដ្ឋកិច្ចដោយផ្អែកលើផលិតភាពការងារ។

ក្នុងជំនួបជាមួយពិភាក្សាការងារជាមួយគណៈប្រតិភូក្រុមហ៊ុន RMA Cambodia វិទ្យាស្ថាន Bendigo Kangan Institute (BKI) របស់អូស្ត្រាលី និងមជ្ឈមណ្ឌលឧត្តមភាពយានយន្តនៅកម្ពុជា ឯកឧត្តម វង្សី វិស្សុត បានលើកឡើងថា គម្លាតនៃប្រភេទជំនាញនិងគុណភាពជំនាញនៅក្នុងទីផ្សារជាមួយនឹងតម្រូវការជំនាញជាក់ស្តែង ទាំងក្នុងវិស័យផលិតយានយន្ត ក៏ដូចជាវិស័យដទៃទៀត គឺជាបញ្ហាប្រឈមសំខាន់មួយដល់ការអភិវឌ្ឍនិងការជំរុញកំណើនសេដ្ឋកិច្ចកម្ពុជា។

តំណាងគណៈប្រតិភូ បានបញ្ជាក់ថា មជ្ឈមណ្ឌល ACEC ជាគម្រោងភាពជាដៃគូរវាងរដ្ឋ និងឯកជន (Public-Private Partnership) ផ្តោតលើការរៀបចំឱ្យមានការបណ្ដុះបណ្ដាល និងបំពាក់បំប៉នជំនាញជូនដល់យុវជនកម្ពុជាលើវិស័យយានយន្ត (TVET in Automotive Sector) ក្រោមកិច្ចសហការរវាងក្រុមហ៊ុន RMA Cambodia វិទ្យាស្ថាន BKI របស់ប្រទេសអូស្ត្រាលី និងក្រសួងការងារ និងបណ្តុះបណ្តាលវិជ្ជាជីវៈ ហើយនិទានកម្មនៃការបង្កើតមជ្ឈមណ្ឌល ACEC នេះឡើងគឺដោយសារ ការមើលឃើញពីភាពមានកម្រិតក្នុងការបណ្តុះបណ្តាលវិជ្ជាជីវៈលើវិស័យយានយន្តនៅកម្ពុជា៕