ភ្នំពេញ៖ សហគ្រិនខ្មែរ Khmer Enterprise ដែលជាអង្គភាពមួយស្ថិតក្រោមក្រសួងសេដ្ឋកិច្ច និងហិរញ្ញវត្ថុ បានបង្កើតកម្មវិធី «ធុរកិច្ចជំនាន់ថ្មី» (NEXTGEN Enterprise) ជំនាន់ទី១ ក្នុងគោលបំណងជួយពង្រឹងសមត្ថភាព និងជំនាញគ្រប់គ្រងអាជីវកម្មដល់សហគ្រិន និងម្ចាស់សហគ្រាសធុនតូច និងមធ្យម(SMEs)។ នេះបើតាមការចុះផ្សាយរបស់សហគ្រិនខ្មែរ Khmer Enterprise កាលពីថ្ងៃទី៧ ខែឧសភា ឆ្នាំ២០២៤។

វគ្គសិក្សាកម្រិតទី១ នឹងសិក្សាអំពី «ការអភិវឌ្ឍភាពជាអ្នកដឹកនាំបែបសហគ្រិនភាព» ដើម្បីសហគ្រាសធុនតូច និងមធ្យមអភិវឌ្ឍន៍ជំនាញក្នុងការលក់ របៀបធ្វើទីផ្សារផលិតផល និងសេវាកម្ម ក៏ដូចជាបង្កើនការយល់ដឹងអំពីគំរូអាជីវកម្មឈានទៅដល់គោលដៅដែលត្រឹមត្រូវ។ ក្នុងវគ្គសិក្សានេះ សហគ្រាសត្រូវចូលរួមរយៈពេល ១ខែ សម្រាប់វគ្គបណ្ដុះបណ្ដាលក្នុងថ្នាក់រៀន និងការបង្វឹកជាក្រុម។

វគ្គសិក្សាកម្រិតទី១ ដែលគាំទ្រដោយសហគ្រិនខ្មែរ Khmer Enterprise និងដឹកនាំដោយក្រុមហ៊ុន Grow4Growth Consultant នឹងចាប់ផ្ដើមនាថ្ងៃទី១៥ ខែមិថុនា ឆ្នាំ២០២៤ នៅអគារមជ្ឈមណ្ឌលអភិវឌ្ឍន៍ធុរកិច្ច (BDC) ជាន់ទី៩។ សហគ្រិនទូទៅ និងម្ចាស់សហគ្រាសធុនតូច និងមធ្យម ដែលមានបំណងចូលរួមវគ្គបណ្តុះបណ្តាលអាចចុះឈ្មោះបានតាមរយៈតំណភ្ជាប់ https://forms.gle/AnHv6xM83cotVdET7 ឱ្យបានមុនថ្ងៃទី៣១ ខែឧសភា ឆ្នាំ២០២៤៕