ភ្នំពេញ៖ នៅតាមបណ្តាវត្តអារាម សាលារៀន និងរមណីយដ្ឋាននានា ទាំងក្នុងក្រុង និងតាមទីជនបទនៃខេត្តបាត់ដំបង បានរៀបចំរួចរាល់ និងកន្លែងមួយចំនួនទៀត កំពុងត្រូវបានរៀបចំតុបតែងជាបន្តបន្ទាប់ ដើម្បីត្រៀមធ្វើកម្មវិធីសង្រា្កន្តឆ្នាំថ្មី និងអបអរសាទរពិធីបុណ្យចូលឆ្នាំខ្មែរប្រពៃណីជាតិខាងមុខ។ នេះបើតាមការការចុះផ្សាយរបស់មន្ទីរទេសចរណ៍ ខេត្តបាត់ដំបង កាលពីថ្ងៃ៣ មេសា។

ខេត្តបាត់ដំបង នឹងមានព្រឹត្តិការណ៍ «សង្ក្រាន្តបាត់ដំបង ២០២៤» ចាប់ពីថ្ងៃទី១២-១៦ ខែមេសា ឆ្នាំ២០២៤ ក្រោមការរៀបចំរបស់រដ្ឋបាល និងសហភាពសហព័ន្ធយុវជនកម្ពុជាខេត្តបាត់ដំបង។ ការរៀបចំរយៈពេល៤ថ្ងៃនេះ ក្នុងគោលបំណងអបអរពិធីបុណ្យចូលឆ្នាំប្រពៃណីជាតិខ្មែរ ព្រមទាំងផ្សព្វផ្សាយពីវប្បធម៌ ប្រពៃណី ទំនៀមទម្លាប់ ជាពិសេស សក្តានុពលនានារបស់ខេត្តបាត់ដំបង ដល់ភ្ញៀវជាតិ និងអន្តរជាតិ។

បើតាមការចុះផ្សាយរបស់រដ្ឋបាលខេត្តបាត់ដំបង កាលពីខែមីនា ក្នុងព្រឹត្តិការណ៍ «សង្ក្រាន្តបាត់ដំបង ២០២៤» នឹងមានការដាក់តាំងបង្ហាញនូវផលិតផលតាមបណ្តាក្រុង ស្រុកទាំង១៤, ការតាំងបង្ហាញមុខម្ហូបអ្នកបាត់ដំបង, ចាប៉ីដងវែង, ទុរេនយក្ស, ណែមយក្ស, ការប្រគុំតន្រ្តីនៅពេលរាត្រី, ការប្រកួតកីឡាប្រដាល់គុនខ្មែរ និងការតុបតែងលម្អភ្លើងពណ៌ក្នុងក្រុងបាត់ដំបង ខេត្តបាត់ដំបងផងដែរ៕