ភ្នំពេញ៖ ទីផ្សារមូលបត្រកម្មសិទ្ធិ មានទំហំមូលធនូបនីយកម្មទីផ្សារសរុបប្រមាណ ២,៧៨ប៊ីលានដុល្លារ និងទំហំជួញដូរភាគហ៊ុនសរុប ៤ ៥០៨ ៧៣៣ភាគហ៊ុន ដែលទំហំជួញដូរនៅក្នុងទីផ្សារគោលមានប្រហែល ៩៥,១៥% និងទីផ្សារកំណើនមានចំនួន ៤,៨៥%នៃទំហំជួញដូរសរុប។ ដោយឡែក ទីផ្សារមូលបត្របំណុល ពុំមានការជួញដូរលើសញ្ញាបណ្ណសាជីវកម្មណាមួយទេ។

យោងតាមព្រឹត្តិបត្រវិនិយោគិន និងការវិនិយោគ ប្រចាំត្រីមាសទី៤ ឆ្នាំ២០២៤ ដែលចេញផ្សាយដោយ និយ័តករមូលបត្រកម្ពុជា នាថ្ងៃទី២២ ខែមេសា ឆ្នាំ២០២៥ បានឱ្យដឹងថា ក្នុងឆ្នាំ២០២៤ មានវិនិយោគិនសកម្មសរុបចំនួន ៦ ៦៤៧នាក់ បានជួញដូរមូលបត្រកម្មសិទ្ធិនៅ CSX ដោយក្នុងនោះ មូលបត្រកម្មសិទ្ធិរបស់ធនាគាអេស៊ីលីដា ភីអិលស៊ី មានចំនួនវិនិយោគិនជួញដូរច្រើនជាងគេ។ នាពេលបច្ចុប្បន្ន CSX មានផលិតផលចំនួន ពីរប្រភេទ គឺមូលបត្រកម្មសិទ្ធិ (ភាគហ៊ុន) និងមូលបត្របំណុលដែលកំពុងត្រូវបានជួញដូរនៅលើទីផ្សារ។

ទីផ្សារមូលបត្រកម្មសិទ្ធិ មានក្រុមហ៊ុនចុះបញ្ជីសរុបចំនួន១១ ក្រុមហ៊ុន ដែលនៅក្នុងនោះ ក្រុមហ៊ុនចំនួន៩ បានចុះបញ្ជីនៅទីផ្សារគោល និងក្រុមហ៊ុនចំនួន២ បានចុះបញ្ជីនៅទីផ្សារកំណើន។ ជាមួយគ្នានេះ ទីផ្សារមូលបត្របំណុល គឺមានក្រុមហ៊ុនចំនួន១២ បានបោះផ្សាយលក់មូលបត្របំណុល ដែលក្នុងនោះមូលបត្របំណុលដែលកំពុងចុះបញ្ជីមានចំនួន១០ និងមូលបត្របំណុលចំនួន៧ បានដល់ឥណប្រតិទាន៕