ភ្នំពេញ៖ មន្ត្រីជំនាញបានរកឃើញទីតាំងសិប្បកម្មផលិតផលិតផលម្ហូបអាហារ ១កន្លែង នៅខណ្ឌទួលគោក និងទីតាំងផលិតស្តុកទុកនំបាយក្តាំង និងគ្រឿងសមុទ្របង្កក ២កន្លែង នៅខណ្ឌដង្កោ មិនត្រូវតាមស្តង់ដារបច្ចេកទេស និងបទប្បញ្ញត្តិច្បាប់នោះទេ។

បើតាមការបញ្ជាក់របស់មន្ត្រីជំនាញ នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ(ក.ប.ប.) កាលពីថ្ងៃទី២២ ខែមីនា ឆ្នាំ២០២៤ ទីតាំងផលិត ស្តុកទុក និងចែកចាយ ទាំង៣នោះ ត្រូវបានមន្ត្រីយើងរកឃើញថា ពុំស្របតាមស្តង់ដារបច្ចេកទេស និងបទប្បញ្ញត្តិជាធរមានឡើយ។

ផលិតផលដែលមន្ត្រីជំនាញបានចុះស្រាវជ្រាវនិងរកឃើញនោះ ត្រូវបានដកយកសំណាកគំរូមួយចំនួនពីទីតាំងទាំង៣នោះ និងបញ្ជូនទៅនាយកដ្ឋានមន្ទីរពិសោធន៍ នៃអគ្គនាយកដ្ឋាន ក.ប.ប. ដើម្បីធ្វើការវិភាគលម្អិតបន្ថែម រកពីសារធាតុគីមីហាមឃាត់លើទំនិញទាំងនោះ៕