ភ្នំពេញ៖ ស្ថានទូតជប៉ុន សហការជាមួយស្ថាប័នទេសចរណ៍ជាតិជប៉ុន រៀបចំ«ទស្សនាពិព័រណ៍ទេសចរណ៍ជប៉ុនឆ្នាំ២០២៤» នៅថ្ងៃទី៧-៨ ខែធ្នូ ឆ្នាំ២០២៤ ដើម្បីផ្សព្វផ្សាយពីវប្បធម៌ជប៉ុន ដូចជា ថតរូប ដោយស្លៀកពាក់ឈុតសម្លៀកបំពាក់ប្រពៃណីជប៉ុន(យឺកាតាក់), ការសម្តែងវាយស្គរបែបប្រពៃណីពីក្រុម មេគង្គដៃកុ និងកម្មវិធីជាច្រើនទៀត។

តាមការចុះផ្សាយរបស់ស្ថានទូតជប៉ុនប្រចាំកម្ពុជា នាថ្ងៃទី២៩ ខែវិច្ឆិកា ឆ្នាំ២០២៤ ពិព័រណ៍ទេសចរណ៍ជប៉ុនឆ្នាំ២០២៤ ចាប់ផ្តើមនៅម៉ោង ១០:០០ព្រឹក ដល់ ៩:០០យប់ ដែលស្ថិតនៅផ្សារទំនើបអ៊ីអនសែនសុខ (អ៊ីអន២) ជាន់ផ្ទាល់ដី Central Court ដែលកម្មវិធីនេះ បើកឱ្យសាធារណជន ចូលរួមសេរី។

ចំពោះ សាធារណជនដែលចូលរួមកម្មវិធីខាងលើ នឹងមានឱកាសទទួលបានរង្វាន់អនុស្សាវរីយ៍ជាច្រើន តាមរយៈការឆ្លើយសំណួរនៅកម្មវិធី និងទទួលបានខិត្តប័ណ្ណ ពិសេសព័ត៌មានផ្សេងៗស្តីពីដំណើរកម្សាន្តទៅកាន់ប្រទេសជប៉ុនផងដែរ៕