ភ្នំពេញ៖ រដ្ឋាភិបាលជប៉ុន បានឯកភាពផ្តល់ជំនួយឥតសំណងសម្រាប់គម្រោងទ្រង់ទ្រាយតូចវប្បធម៌គូសាណូណិ ដែលមានចំនួន ៣៨,៧៥០ដុល្លារអាម៉េរិក សម្រាប់អនុវត្តគម្រោង«កែលម្អឧបករណ៍តន្រ្តីបុរាណ នៅសាលាមធ្យមវិចិត្រសិល្បៈ»។

កិច្ចសន្យាផ្តល់ជំនួយនេះ ត្រូវបានចុះហត្ថលេខាលើកិច្ចព្រមព្រៀងនៅថ្ងៃទី២០ ខែមីនា ឆ្នាំ២០២៤ រវាងលោកឯកអគ្គរាជទូត អ៊ូអិណុ អាត់ស៊ូស៊ី ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំនៅកម្ពុជា និងតំណាងពីសាលាមធ្យមវិចិត្រសិល្បៈ។ លោកឯកអគ្គរាជទូត អ៊ូអិណុ បានបង្ហាញសេចក្តីសង្ឃឹមថា ជំនួយឥតសំណងលើគម្រោង«កែលម្អឧបករណ៍តន្រ្តីបុរាណ នៅសាលាមធ្យមវិចិត្រសិល្បៈ»នេះ នឹងចូលរួមចំណែកថែរក្សាវប្បធម៌ប្រពៃណីរបស់កម្ពុជាទៅថ្ងៃអនាគត និងលើកកម្ពស់មិត្តភាពជប៉ុន-កម្ពុជាបន្ថែមទៀត៕