ភ្នំពេញ៖ ក្រសួងពាណិជ្ជកម្ម ជំរុញឱ្យក្រុមហ៊ុន សហគ្រាសរបស់ខ្មែរ ចូលរួមក្នុងពិព័រណ៍ THAIFEX-Anuga Asia 2024 នៅទីក្រុងបាងកក ប្រទេសថៃ ដែលនឹងប្រព្រឹត្តិទៅចាប់ពីថ្ងៃទី២៨ ខែឧសភា ដល់ថ្ងៃទី០១ ខែមិថុនា ឆ្នាំ២០២៤។ ពិព័រណ៍ដែលមានរយៈពេល៥ថ្ងៃនោះ ផ្តោតលើផលិតផលម្ហូបអាហារ និងសម្ភារប្រើប្រាស់ក្នុងភោជនីយដ្ឋាន និងសណ្ឋាគារ។

ក្នុងសេចក្តីប្រកាសព័ត៌មានរបស់ក្រសួងពាណិជ្ជកម្មនៅថ្ងៃទី២៩ កុម្ភៈនេះ គណៈកម្មការរៀបចំពិព័រណ៍បានផ្តល់ស្តង់មួយចំនួនជូនក្រសួងពាណិជ្ជកម្មកម្ពុជា ដើម្បីផ្តល់ជូនក្រុមហ៊ុន/សហគ្រាសកម្ពុជា នាំយកផលិតផលទៅចូលរួមដាក់តាំងបង្ហាញ និងស្វែងរកដៃគូពាណិជ្ជកម្មជាអន្តរជាតិ។ ពិព័រណ៌រៀបចំដោយនាយកដ្ឋានជំរុញ ពាណិជ្ជកម្មអន្តរជាតិ ក្រសួងពាណិជ្ជកម្ម នៃព្រះរាជាណាចក្រថៃ។ 

ក្រៅពីដាក់តាំងបង្ហាញផលិតផលម្ហូបអាហារ និងភេសជ្ជៈ ឧបករណ៍សម្ភារៈបម្រើដល់ការផលិតម្ហូបអាហារ និងសម្ភារប្រើប្រាស់ក្នុងសណ្ឋាគារ និងភោជនីយដ្ឋាន ក៏នឹងផ្តល់ឱកាសដល់សហគ្រិនខ្មែរបង្កើតបណ្តាញអាជីវកម្មនៅក្នុងឧស្សាហកម្ម ម្ហូបអាហារនិងភេសជ្ជៈ និងវិស័យពាក់ព័ន្ធរបស់ថៃ និងបណ្តាប្រទេសមួយចំនួនទៀតផងដែរ។

ព័ត៌មានបន្ថែមទាក់ទងទៅមន្ត្រីសម្របសម្រួលដើម្បីចូលរួមក្នុងកម្មវិធី តាមរយៈទូរស័ព្ទលេខ ០១២ ៧៧៧ ៩៥៩ ០៧៧ ៣៦១ ៨៣៦ និងអីម៉ែល [email protected] ឬ [email protected] ៕