ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ណែនាំឱ្យក្រុមហ៊ុនស៊ីណូ អាហ្គ្រីប៉ូតាស (Sino-Agri Potash Co.,Ltd) របស់ប្រទេសឡាវ ស្វែងយល់ពីតម្រូវការទីផ្សារនៅកម្ពុជាឱ្យបានច្បាស់ ដោយត្រូវនាំចូលជីកសិកម្មដែលមានគុណភាពល្អ មានតម្លៃសមរម្យ និងមានស្តង់ដាខ្ពស់។ នេះបើតាមការចុះផ្សាយរបស់ក្រសួងកសិកម្ម នាថ្ងៃទី០៥ ខែធ្នូ ឆ្នាំ២០២៤។

ក្នុងជំនួបជាមួយ ឯកឧត្តម ឌិត ទីណា នៅទីស្តីការក្រសួងកសិកម្ម ក្រុមហ៊ុន Sino-Agri Potash Co.,Ltd បានបង្ហាញបំណងវិនិយោគលើធាតុចូលកសិកម្មពីប្រទេសឡាវមកប្រទេសកម្ពុជាផងដែរ។ ជាមួយគ្នានេះ រដ្ឋមន្ត្រីក្រសួងកសិកម្ម ក៏បានផ្តល់យោបល់ឱ្យក្រុមហ៊ុន ត្រូវចូលរួមសហការជាមួយអគ្គនាយកដ្ឋានកសិកម្ម ដើម្បីតេស្តគុណភាពធាតុចូលកសិកម្ម ជាពិសេសជី ឱ្យបានត្រឹមត្រូវតាមស្តង់ដាបច្ចេកទេស។

ក្នុងជំនួបពិភាក្សានេះ ឯកឧត្តម ឌិត ទីណា ក៏បានលើកទឹកចិត្តឱ្យក្រុមហ៊ុន ស្វែងយល់ពីនីតិវិធីច្បាប់ និងនីតិវិធីការចុះបញ្ជីផលិតផលសម្រាប់ពាណិជ្ជកម្មកម្ពុជាឱ្យបានច្បាស់លាស់ និងត្រឹមត្រូវផងដែរ៕