ភ្នំពេញ៖ ក្រុមហ៊ុនបុត្រសម្ព័ន្ធរបស់ ក្រុមហ៊ុន China Energy Engineering Group Co., Ltd. (CEEC) របស់ចិន ខេ.ភី ស៊ីមេន អ៊ិនដាសស្រ្ទី ឯ.ក មានបំណងវិនិយោគលើគម្រោងសាងសង់កំពង់ផែពហុបំណង ស្ថិតក្នុងស្រុកព្រែកប្រសប់ ខេត្តក្រចេះ ជាមួយទុនវិនិយោគ ៣៥លានដុល្លារ ព្រមទាំងសាងសង់ហេដ្ឋារចនាសម្ព័ន្ធចាំបាច់នានា សម្រាប់បម្រើដល់ការវិនិយោគ និងការដឹកជញ្ជូនកសិផល។

ក្នុងជំនួបពិភាក្សាអំពីការស្នើសុំវិនិយោគ ក្នុងខេត្តក្រចេះ ឯកឧត្តមបណ្ឌិតសភាចារ្យ ហ៊ាន សាហ៊ីប ប្រធានក្រុមការងារជំរុញការវិនិយោគក្នុងភូមិភាគឦសាន លើកឡើងអំពី «កម្មវិធីពិសេសជំរុញការវិនិយោគក្នុងខេត្តទាំងបួននៅភូមិភាគឦសាន» ដែលមានគោលបំណងជំរុញការវិនិយោគលើវិស័យអាទិភាព តាមរយៈការផ្តល់ការលើកទឹកចិត្តពិសេស ការអនុគ្រោះ និងការសម្រួលនីតិវិធី ទាំងផ្នែកសារពើពន្ធ និង មិនមែនសារពើពន្ធ នៅខេត្តភូមិភាគឦសានទាំង៤ របស់កម្ពុជា។

សូមជម្រាបថា ក្រុមហ៊ុន ខេ.ភី ស៊ីមេន អ៊ិនដាសស្រ្ទី ឯ.ក ជាក្រុមហ៊ុនបុត្រសម្ព័ន្ធរបស់ក្រុមហ៊ុន China Energy Engineering Group Co., Ltd. (CEEC) ដែលមានទីស្នាក់ការនៅរដ្ឋធានីប៉េកាំង ប្រទេសចិន ។ ក្រុមហ៊ុននេះ មានសាខាចំនួន ២៥៦កន្លែង ក្នុងប្រទេសចំនួន ១៤០ និងមានជំនាញវិនិយោគលើឧស្សាហកម្មថាមពល និងហេដ្ឋារចនាសម្ព័ន្ធទូទាំងពិភពលោក។ នេះបើយោងតាម វិទ្យាស្ថានសេដ្ឋកិច្ច និងហិរញ្ញវត្ថុ៕